Oanehisfilbma «Rieban» man Sara Margrethe Oskal lea buvttadan ja bagadallan čájehuvvo vuosttaš geardde Maoriland filbmafestiválas dán vahkkoloahpa.
Giehtačállosa vuođđu lea teáhterbihttá maid Oskal lea ráhkadan ja lea ge dan birra go rieban, duot skealbma, viggá dájuhit earáid. Filmmas lea dievdu oaggume duoddaris. Nu lea maiddái Rieban, ja sus lea iežas, áibbas earenoamáš bivdinmálle.
– Dáinna čalmmustahtán dan mii lea mu vuolggasadji šaddat dáiddárin, namalassii juoigan ja muitaleapmi. Áidna sátni mii hubmojuvvo filmmas lea «guolit», muđui dušše juigojuvvo dahje ráppejuvvo. Dákkár filmma in leat ovdal oaidnán, dadjá Oskal.
Filmmas oassálastiba neavttár Ingá Márja Sarre guhte neaktá riebana ja dovddus rap-artista Ailu Valle. Ja filbma lea ge su debuhta filbmaneavttárin.
Internašunála Sámi Filbma instituhtta ja Sámi Dáiddáfoanda leat dorjon filmma ja ii leat vuos dihtosis goas dan beassá oaidnit sámi guovlluin.
