Olu sámi girječállit leat prográmmas «Littfest» nammasaš girjefestiválas Upmejes njukčamánus.
«Littfest» lea stuora jahkásaš girjjálašvuođa lágideapmi Upmejes. Dán jagáš prográmmas leat olu sámi girječállit prográmmas. Earret eará bohtet sámi dovddus rapparat SlinCraze ja Áilu Valle sihke logaldallat ja ráppet Upmeje girjefestiválas.
«Čuovga»
Maŋemus eahkeda lágiduvvo «Čuovga» girjjálašvuođaeahket gos seaguhit musihka ođđa čállojuvvon teavsttain gosa sámi čállit servet. Fáddá lea čuovga ja dan árktalaš dáistalepmi davviguovlluin.
Doaluid dáiddalaš jođiheaddji lea Patricia Fjellgren gii illuda eahkedii.
– Lea hui gelddolaš proseassa maid mii čađahit ovttas gos mii ovttas jorggáhallet fáttá birra. Čuovga lea Sámis sihke luonddus, áigodagain ja olbmuin. Sámi álbmot lea biddjon suoivvanassii, muhto doppe lea maid čuovga ja doaivva, dadjá Fjellgren preassadieđáhusas.
Musihka eahkedii lea Jakop Janssønn ráhkadan ja girječállit ieža lohket teavsttaid musihkkii. Leat dat girječállit geat oassálastet, Ánne Márjá Guttorm Graven, Niillas Holmberg, Niilas Helander, Rose-Marie Huuva, Ánná Káisá Partapuoli ja Jörgen Stenberg.
