Golihii dušše okta minuhtta, de lei beannot miljovnna ruvdno boahtán LAVO.TV iežaskapitálan ruhtačoaggingálduid bokte.
Golihii dušše okta minuhtta, de lei beannot miljovnna ruvdno boahtán LAVO.TV iežaskapitálan ruhtačoaggingálduid bokte.
– Lea leamaš hirbmat somás vásáhus dán rádjái, ja illudan juogadit dán ilu eambbosiiguin, muitala vuođđudeaddji ja stivrajođiheaddji Tom Roger Sokki preassadieđáhusas.
Gearggus Børsii
LAVO.TV viežžala 15 miljovnna ruvnno dál, masa buohkat Norggas bovdejuvvojit searvat.
Ovdalaččas leat oastit nu go vieljašguovttes Torstein ja Øystein Tvenge, Bergen Angel Network, Tom Erik Kjeseth ja brihttalaš oastinfoanda Alpha Blue Waters bidjan ruđaid fitnodahkii.
Plána lea oažžut LAVO.TV Oslo Børsii giđa mielde.
TV-márkan rievdá
– Lea hui gelddolaš ahte gártet eambbogat geat fárus eaiggáduššet dán fitnodaga. Mii leat aiddo álggahan dán mátkki, ja galgat stuorrut sihke Davviriikkain ja máilmmis. TV-márkan rievdá hirbmadit, ja dušše 2016:s 2017:i rádjái heite ollugat geahččamis dábálaš TV. Norggas heite birrasii 40 proseantta sis geat leat gaskal 15- ja 29-jahkásaččat geahččame dábálaš TV-sáddagiid, oaivvilda Sokki ja lohká ahte dát geavvá daiguin geat gehččet filmmaid eambbo go goassege ovdal.
– Lea dákko gokko mii boahtit oidnosii, dieđiha Sokki.
Dealflowas lea ovttasbargu Norne Securities soabahanfitnodagain, ja lea vuosttaš nu gohčoduvvon crowdfunding-lágideaddji mas lea dohkkeheapmi Ruhtabearráigeahčus čađahit dakkár ruđalaš bálvalusaid.
Stuora doaivva álbmotruhtadeapmái
Tom Roger Sokki jáhkká teknologiija šaddat dehálaš ruhtadangáldun Norgga fitnodagaide mat leat álggahandásis. 2016:s vižže 7,6 miljárdda euro EU-guovlluin dakkár ruhtačoaggimiin, muhto Norggas ii leat dakkár vuogádat vuos mihtidanmuttus ge.
– Dakkár ruhtadanvuohki lea ollu miehtá máilmmis, muhto Norggas ii leat dakkár bálvalus nu olamuttos. Vuosttažettiin dan dihte go leat garra njuolggadusat sidjiide geat fállet dakkár bálvalusa. Dál orrot dihttome eambbogat geat fállet dákkár vuogi, ja dat galggašii leat buorre ođas fitnodatálggaheddjiide, smávit ja stuorát ruhtadeddjiide ja AS Norgii. Dat leat boahtteáiggi bargosajit main lea sáhka, loahpaha Sokki preassadieđáhusas.
