Porsáŋggu gielda ávžžuha nannosit Porsáŋggu servviid ja joavkkuid, mat fállet iešguđet doaimmaid iešguđet ahkásaš mánáide ja nuoraide, bissehit doaimmaid dan botta go covid-19 dávda leavvá gielddas.
Porsáŋggu gielda čilge ahte dál lea gielddas duođalaš covid-19 njoammudávda ja čujuha njoammudávdaeastadanláhkii, paragráfa 4-1, b bustávvii, ahte sii ávžžuhit nannosit bissehit buot mánáide ja nuoraide fállojuvvon doaimmaid nu guhká go dávda lea gielddas.
– Jus mii galgat nagodit ráddjet njoammudávdda leavvama, de lea hirbmat dehálaš ahte doallat eiseválddiid rávvagiid ahte eat seagut iešguđet ahkásaš joavkkuid, dieđiha gielda.
Ulbmil dáinna ávžžuhusain lea vuosttamuččat hehttet njoammuma leavvamis, ráddjet man galle lagaš olbmo ferte bidjat erremii jus dávda njoammu viidásabbot.
– Eat mii hálit šaddat dakkár dillái ahte ferte giddet skuvllaid nu mo mii šattaimet dahkat njukčamánus 2020:s. Jus eat bisset dáid mánáid- ja nuoraid astoáiggedoaimmaid, de duššin dahkat mii barggu skuvllas, sirret luohkáid iešguđet sadjái.
– Mii háliidat maid deattuhit ahte lea dehálaš doalahit mánáide ja nuoraide astoáiggefálaldaga, muhto dan ferte heivehit amas eat seagut daid joavkkuid, čállá gielda ávžžuhusastis.
