-Almmuhus-
-Almmuhus-
GUOIMMUHEAPMI– Ávžžuhan mannat lonohallamii!

– Ávžžuhan mannat lonohallamii!

-

-

Dál go geassi lea ollen, leat lonohallanoahppit nai máhccagoahtán Sápmái. Ávvir lea humadan muhtuniin gii amasgielagiid luhtte lea orron jagi Sveitsas. 

Guovdageaidnulaš Áigin Juhls lea aitto leamaš lonohallanoahppin Davvi-Sveitsas, ja lea ge dál gárven oahppojagi doppe. 

 – Lea leamaš hui somá, lei áibbas ođđa vásáhus munnje leat jagi ruovttus eret. 

 

Son muitala ahte manai lonohallamii eanemusat dan váste vai oahppá duiskagiella, go son lea bealle duiskalaš.

Dat ii mannan álggos nu njuovžilit go maid lei jáhkkán.

– Dat lei gal hui earálágán das maid mun ledjen vuordán, danne go sis lea áibbas eará hupmanmálle ja suopman doppe, man lei váttis ipmirdit. Nu ahte lei veaháš váttis beassat dan vuogádahkii doppe ja oahpásnuvvát olbmuide, muitala son. 

– Ledjen rievttimielde háliidan Lulli-Sveitsii, go liikon čuoigat ja nie, muhto ii lean vejolaš beassat juste dohko gosa ieš háliida. 

 

Son muitala ahte dat jáhki gal lea muitinveara, ii ge gáđa gal go manai lonhallamii.

– Dat lei máŋgga dáfus hui gelddolaš jahki, lean oahpásnuvván ođđa olbmuide ja ođđa áššiid vásihan

 

Somá eará temperatuvrraid vásihit

– Mii lei dat suohttaseamos lonohallanjagis?

– Dat lei várra dat ahte beassat vásihit eará temperatuvrraid go dat mat Guovdageainnus leat. Doppe ii leat báljo muohta dálvet, ja galbmaseamos lei go ledje vihtta buolašceahki nu ahte dat lei oalle erenoamáš. Njukčamánu ja cuoŋománu rájes šaddagođii juo hui bivval, badjel 10 lieggaceahki. 

 

Váillahii meahci buot eanemusat

– Guovdageaidnu lea hui unni ja buohkat dovdet nubbi nuppi, ja doppe Sveitsas aivve oaidná ođđa olbmuid ja áššiid, nu ahte šaddet ollu muitogovat, go oktanis lea buot. 

 

Son muitala ahte dat maid váillahii eanemusat, lei dat ahte beassat njuolga meahccái mannat ja akto beassat bosihit. Dakkár vejolašvuohta ii lean gal Sveitsas.

– Sveitsas gal lea juohke logat kilomehtera duohken ođđa gilli. 

 

Son ávžžuha eará nuoraid nai lonohallanoahppin mannat olgoriikkii. 

– Dat lea coolas vásáhus, ja olmmoš han nai oahppá das ollu. Ja Sveitsas don nai oahpat soamesláhkái guokte giela, go doppe sii hupmet Sveitsa-duiskagiela ja dan dábálaš duiskagiela. Ja jus olmmoš liiko dan seamma lundui go mii Norggas lea, alla várit, de lea Sveitsas sullii nugo doppe maid.

 

Ii vel geargan mátkkošteamis

Áigin ii leat vel ollen ruoktot Norgii, go lea dál luomus Duiskas, muhto son lea gal gárven oahppojagi ja guođđán Sveitsa.

– Lei hui ártet guođđit buot go vulgen doppe. Lei váivi guođđit verddebearraša ja olbmáid, muhto lei gal hui suohtas iežan bearraša fas oaidnit. Olmmoš han oažžu čanastagaid ja oktavuođaid daid olbmuide geat doppe leat, erenoamážit loahpageahčen lonohallanjagis. 

 

Sus leat vel guokte jagi joatkkaskuvllas, danne go ferte ođđasit lohkat dán jagi go lei lonohallamis. 

 – Áiggun fokuseret skuvlii dán guokte boahtte jagi. Joatkkaskuvlla maŋŋel gal háliidan mátkkoštit veaháš, Lulli-Ámerihkii mannat jahkái, muitala Áigin. 


ÁVVUDII JUOVLLAID SVEITSAS: Áigin lea leamaš olles jagi lonohallamis Sveitsas, ja doppe ávvudii nai juovllaid bearraša haga. (Priváhtagovva)

 

 

-Almmuhus-