Ronny ja Ken leaba deaddilan sámi leavgga báidái ja leaba sihkkarat ahte Agnete beassá viidásat lávvardaga finálii. Soai leaba garra Eurovision berošteaddjit, go soai náitaleigga golbma jagi áigi Eurovision doaluin.
Ronny ja Ken leaba deaddilan sámi leavgga báidái ja leaba sihkkarat ahte Agnete beassá viidásat lávvardaga finálii. Soai leaba garra Eurovision berošteaddjit, go soai náitaleigga golbma jagi áigi Eurovision doaluin.
Odne eahkes lávlu Agnete Johnsen iežas lávlaga «Icebreaker» Eurovision Song Contest 2016:i oassefinálas Stockholmas, Ruoŧas. Ronny Edvardsen ja Ken Bakke leaba boahtán Stockholmii čuovvut Agnete ja maiddái ávvudit iežaska náittosbeaivvi.
– Moai gal doivo Agnete beassat viidásat odne oassefinálas, letne measta juo oalle sihkar das. Go oidne geat manne viidásat vuosttaš oassefinálas, de lea Agnetes oalle buorre vejolašvuohta beassat finálii, dadjá Ken Bakke.
Soai leaba ráhkkaneamen otná oassefinála doaluide. Soai áiguba fitnat Stockholma Globe Arenas bearašdoaluin gos Agnete lávlu ovdal go oassefinála álgá odne eahkedis diibmu 21:00.
– Eurovision leat TV-doalut ja moai ean vuolgge geahččat oassefinála Globe Arenas. Munnos lea dáhpi geahččat Eurovisiona TV:s ja das oaidná buot buoremusat. Danne moai manne EuroClubii geahččat oassefinála stuorrašearpmas eará Eurovisions berošteddjiiguin ja dat šaddá hui somá, dadjá Ronny Edvardsen.
Náitaleigga EuroClub lávddis
Ken ja Ronny náitaleigga Københápmanis, Danmárkkus, go Emmelie de Forest vuittii Eurovision Song Contest 2013 lávlagiin «Only Teardrops». Dán jagi leaba leamaš náittosdilis golbma jagi ja Eurovision lea hui dehálaš sudnuide.
– Moai náitaleimme EuroClubas Københápmanis go doppe lei Eurovision. Munno heajat eai lean nu plánejuvvon, nu ledje ollu skihpárat ja fuolkkit geat hirpmahuvve go náitaleimme lávddi alde EuroClubas. Munnos ledje 1500 headjaguossi ja ledne deaivan hui máŋgasa dain dáppe Stockholmas. Lea hui somá go dat geat ledje EuroClubas dalle, muitet munno heajaid, dadjá Ronny.
Soai juohke jagi johttiba riikkaide gos Eurovision finála lea.
Agnetes váttis lávlla ja javkosis leamaš
Soai doaivuba Agnete beassat finálii, muhto eaba jáhke Agnete vuoitit finála:
– Agnete lávlagis «Icebreaker» molsašuvvo šuokŋa refreaŋŋas ja dat sáhttá earáide šaddat hui ártet. Dan lávlaga ferte máŋgii gullat ovdal šaddá buorre ja iige oro šat ártet, dadjá Ken.
– Moai gal letne hui Eurovision berošteaddjit ja letne guldalan lávlagiid máŋgii, muhto stuorát oassi olbmuin gullet lávlaga dušše oktii ovdal go jienastit, sin mielas sáhttá lávlla orrut menddo ártet, dadjá Ronny.
Agnete ii leat searvan Eurovision doaluide, iige leat dássážii adden jearahallamiid mediaide dan botta go lea leamaš Stockholmas ráhkkaneamen Eurovision gilvvuide, berošteaddjiguovttos ballaba dan maid sáhttit váikkuhit bohtosiidda.
– Agnete ii leat oidnosis dáppe Stockholmas ja medias. Lea leamaš hui jaskat su birra ja dasa leat sivat. Jáhkán go son lea hui anonyma Eurovision oktavuođas, maid váikkuha hui ollu go olbmot galget jienastit, dadjá Ronny.
Sámi leavga
Ronny ja Ken leaba deaddilan sámi leavgga ja «Icebreaker» iežaska vilges t-báiddiide.
– Moai ean leat sápmelaččat muhto moai háliidetne čájehit ahte Sámi leavga lea seamma árvvus go Norgga leavga. Ja seammás go Agnete lea sápmelaš de háliideimme gudnejahttit su sámeleavggain. Dat stuimmit mat ledje go beakkehii ahte ii galgan leat lohpi geavahit sámi leavgga Eurovisionis, lei maid okta sivva dasa go háliideimme deaddilit sámeleavgga báidái, dadjá Ken.
– Sámi leavga gálgá maiddái leat dego «Icebreaker». Munnos leat dat odne badjelis go lea oassefinála mas Agnete galgá lávlut, ja doaivumis moai sáhtte coggat dán báiddi maiddái lávvardaga, dadjá Ronny.
