-Almmuhus-
-Almmuhus-
OĐĐASATÁvvir Cup ii lágiduvvo

Ávvir Cup ii lágiduvvo

-

-

Korona leavvama geažil eai lágiduvvo Ávvir Cup spábbačiekčangilvvut dán jagi ge. 

Ávvir Cup lea lágiduvvon vuosttaš geardde 2019:s, muhto jagi maŋŋel eai šaddan dát gilvvut. Dál leat lágideaddjit fas mearridan ahte eai lágit spábbačiekčamiid mat galge lágiduvvot vuosttaš vahkkoloahpa juovlamánus. 

– Mii leat ságastallan suohkandoaktáriin ja suohkana koronajoavkkuin, ja gávnnahan ahte ii gánnát lágidit čiekčamiid go čohkke nu olu olbmuid iešguđet báikkiin, dadjá okta lágideddjiin Guovdageainnu valáštallansearvvis, Janne Eilen Mienna Guttorm.

SÁVVÁ JOAVKKUID AIN DIEĐIHIT NUPPE HÁVVÁI: Ávvir-Cup lágideaddji Janne Eilen Mienna Guttorm Guovdageainnu valáštallansearvvis. Priváhta govva
SÁVVÁ JOAVKKUID AIN DIEĐIHIT NUPPE HÁVVÁI: Ávvir-Cup lágideaddji Janne Eilen Mienna Guttorm Guovdageainnu valáštallansearvvis. Priváhta govva

Ledje boahtime Romssas ja Oslos

Lágideaddjit doivo dušše guokte vahkku áigi ahte šaddet čiekčamat, muhto dál go Finnmárkkus leavvá koronadávda, de mearridedje šluhttet čiekčamiid. 

– Eat mii lean gal dalle ge áibbas sihkkarat. Mii leat čuvvon movt koronadilli ovdána, ja maŋemus áiggi lea dávda leavvan hui olu Finnmárkkus. Spábbačiekčangilvvut čohkkejit hui olu olbmuid. Čiekčamiidda ledje dieđihan joavkkut ja čiekčit sihke Oslos ja Romssa guovllus ja dieđusge Finnmárkkus, dadjá Mienna Guttorm.

16 joavkku ledje dieđihuvvon

Oktiibuot ledje dieđihuvvon 16 joavkku, vihtta nissonjoavkku ja 11 dievdojoavkku. 

– Olusat leat jearahan maŋemus áiggiid šaddet go čiekčamat. Lean ikte addán dieđu buot joavkkuide ahte mii leat šluhtten lágideami. Lei buoremus šluhttet vai eat leat fárus  njoammudeames vel viidábut dávdda. Fertet oaidnit šaddet go gilvvut ođđajagis vai vuordit go mii jagi vel ovdal lágidit. Sávan goit ahte go fas beassat lágidit, de bohtet seamma joavkkut ja vel eambbo joavkkut go dál ledje dieđihan, dadjá Mienna Guttorm. 

-Almmuhus-