Olu dieđihanáššis politiijas čájeha ahte lea dárbu buoridit dieđihanvuogádaga, dan sivas lea justiisa- ja gearggusvuođaministar mearridan ásahit dieđihanáittardeaddji politiijai.
Justiisa- ja gearggusvuođaministtar Emilie Enger Mehl čállá preassadieđáhusastis ahte dieđihanáittardeaddji ásahuvvui álgovuorus guovtti jahkái. Dieđihanáittardeaddji čállingoddi lea Stáhta siviilariektihálddahusas Hamaris.
– Lean rámis go mii dál sáhttit muitalit ahte mii ásahit sorjjasmeahttun nationála dieđihanáittardeaddji politiijai. Lea ođđa bargovuohki, ovttas politiijaid fágaservviiguin ja suodjalusáittardeddjiin. Vásihan ahte ovttasbargu leamašan mearrideaddji go mii dál leat gávdnan dan čovdosa, dadjá Mehl preassadieđáhusastis.
Departemeantta mihttu lea ahte dieđihanáittardeaddji ásahuvvo ovdal njukčamánu 1. beaivvi 2024. Lea Justiisa- ja gearggusvuođadepartemeanta mii nammada áittardeaddji guovtti jahkái.
