Boahtte vahkkus mearridit Stáhta geaidnodoaimmahat ahte guhkidit go 60 km/d leaktomeari Márkanjárggas Suomageidnui. Jus dan dahket de boahtá dákko ođđa leaktomearrešilta.
– Árvalus lea sáddejuvvon gulaskuddamii ja dalle min árvalus dohkkehuvvo boahtte vahkkus, jus eai boađe garra moaitámušat geasge, muitala Stáhta geaidnodoaimmahaga ráđđeaddi Jan Inge Johansen, Plána ja hálddašanossodagas Finnmárkkus.
Gielda dorjon
Stáhta geaidnodoaimmahat lea árvvoštallamin guhkidit 60 km/d leaktomeari riikkageainnu 92:s Márkanjárggas Suomageidnui Kárášjoga gielddas. Diet lea oalle njulges gaska, muhto gaskkohagaid lea váttis eará biillaid meaddil vuodjit go geaidnoguoras leat muorat mat dagahit váttisin oaidnit bohtet go ovddal biillat. Gaska man birra lea sáhka lea birrasiid 780 mehter guhko, ja jus guhkidit 60 km/d meari de 60 sona šaddá birrasiid kilomehter guhko. Gaskkas leat golbma luoddaearu stobuide.
– Dássážii ii leat boahtán cealkámuš earágo Kárášjoga gielddas, sii dorjot min árvvoštallama ja leat vel namuhan ahte diekko rasttilda skohtermađiija geainnu, čilge Johansem ja muitala ášši meannuduvvot boahtte vahkkus.
Doaibmagoahtá go šilta lea ceaggut
Stáhta geaidnodoaimmahaga árvvoštallamis čállet ahte luoddaráigge jáhkkimis vázzet ja sihkkelastet olusat, go sidjiide geat ásset dán luoddaguoras lea dákko lagamus geaidnu márkanii ja skuvlii. Stáhta geaidnodoaimmahat lea maid fuomášan guovllus bálgáid maid lohket čájehit ahte leat olusat geat dán luoddaráigge vázzet, muhto geat soitet eará ássanguovlluin orrut.
– Jus meannuduvvo guhkidit 60 sona dákko de mii diŋgot šiltta. Das rájes sáhttá mannat vel mánu dahje guokte ovdal go šilta olle ja ceggejuvvo. Leaktomearri doaibmagoahtá dan rájes go šilta lea ceaggut, čilge Johansen.
Eará geainnuid maid árvvoštallamin
Johansen muitala iežaset bargamin maiddái eará luottaiguin Kárášjogas.
– Mii áigut maid árvvoštallat rievdadit leaktomeriid Báhkkiljogageainnus, mii lea fylkkageaidnu 223 ja dan geainnus mii vuolgá márkanis Guovdageidnui, riikageaidnu 92. Das lea sáhka árvvoštallat vuolidit leaktomeari skuvlla rájes ja birrasiid guokte kilomehtera das eret, muitala Johansen.
