Govvideaddji, filbmadahkki ja girječálli Anstein Mikkelsen oažžu Romssa ja Finnmárkku fylkkakulturbálkkašumi 2022.
– Anstein Mikkelsenis lea issoras báras karrieara leamašan, sihke filbmadahkkin ja girječállin, muhto son lea maiddái čohkken stuorra dokumentašuvdnamateriálaid main lea stuorra mearkkašupmi kvena kulturárbái, cealká Ekonomiija ja kultuvrra fylkkaráđđi, Ronald Wærnes (Gb), juolludeami oktavuođas preassadieđu bokte.
Kvena, Sámi ja Davvi-Norgga
Mikkelsen lea leamašan doaimmalaš filbmabuvttademiin 80-logu rájes, ja lea doaimmalaš ain. Su dokumentárafilbma «Oldemors lue» oaččui aiddo bálkkašumi «Buoremus guhkesdokumentárafilbma» ImagiNATIVE filbmafestiválas mii lei Torontos, Kanadas. Son lea pandemiija-áigge ráhkadan gárvvisin vihtta ođđa filmma iežas ráidui «Kvena filmmat». Máŋga dain filmmain lea vejolaš geahččat nrk.no:s.
Anstein Mikkelsenis leamašan maiddái stuorra mearkkašupmi čalmmustahttit Sámi ja Davvi-Norgga kulturárbbi, lassin kvenaid árbái.
– Anstein Mikkelsen lea leamašan iežas barggu bokte rámálaš ambassadevra olles min davvi kulturárbái, ja golmma álbmoga deaivadeapmái. Son lea ebmui ja gutnálaš fylkkakulturbálkkašumi vuostáiváldi, loahpaha fylkkaráđđi Ronald Wærnes (Gb).
Fylkkakulturbálkkašumi ulbmil lea árvvus atnit ja dohkkehit hutkás dahje doaimmaheaddji dáiddáriid, dahje earáid geat dáiddalaš dahje kultuvrralaš doaimmain leat dahkan erenomáš árjja Romssa ja Finnmárkku kultureallimii. Bálkkašupmi lea 20 000 ruvdnosaš.
