Ođđa rávvagat bohtet njálbmesuoji geavaheamis ja movt johtit kollektiivajohtolagain.
Veahkkedearvvašvuođadirektevra Espen Rostrup Nakstad lohká oanehis áiggi mielde boahtit ođđa rávvagiid geavaheamis njálbmesuoji ja mo johtá kollektiivvajohtolagain, dieđiha NTB.
– Ođđa rávvagat bohtet moatti beaivvi geahčen, dadjá son TV2:i.
Nakstad dieđuid mielde de leat dearvvašvuođaeiseválddit geahčadeamen earret eará mo oažžut vulos sin logu geat johtet oktanaga. Sii maiddái gehččet mo bargosajit sáhttet doalahit ruovttokantuvrraid ja maiddái muddet bargoáiggiid.
– Čielga rávvagat makkár dilálašvuođain njálbmesuodji šaddá áigeguovdilin, dat maid bohtet, dadjá son.
Maŋimuš áigge leaba earret eará Vestlándda fylkkasátnejođiheaddji Jon Askeland ja Oslo dearvvašvuođagávpotráđđi Robert Steen leamaš fuolas go fargga álget skuvllat mat dagahit spaggadievva kollektiivajohtolaga. Askeland lea dáhtton eiseválddiid árvvoštallat njálbmesuoji geavaheami kollektiivvajohtolagas.