Eanet olbmot, geaidda koronavirus njoammu, vásihit ahte dávdamearkkat dovdogohtet árabut go ovdal.
– Ii galgga hirpmahuvvat jus oažžu dávdamearkkaid jándora maŋŋel go lea ovttastallan soapmásiin geas lea koronavirus. Seammás sáhttá gollat guhkit áigi ovdal go dávdamearkkat dovdogohtet, lohká Dearvvašvuođadirektoráhta veahkkedearvvašvuođadirektevra Espen Rostrup Nakstad NRK:i.
Koronavirus lea rievddadan pandemiijaáiggis. Dál njoammu omikronvirusa BA. 5-variánta eanemusat Norggas ja das leat dakkár iešvuođat mat dagahit ahte virus njoammu jođánabbot go ovddeš variánttat.
Geasi njoammunbárru lea njiedjagoahtán, muhto Dearvvašvuođadirektoráhtas einnostit ahte njoammun fas lassána čakčat go olbmot čoahkkanit bargosajiide, skuvllaide ja mánáidgárddiide.
– Mii jáhkkit ahte koronanjoammun lassána go olbmot fas čoahkkanit, muhto mii eat dieđe man viidát ođđa njoammunbárru njoammu ja makkár váikkuhusat das leat, lohká Nakstad. (©NTB)
