Prošeavtta ulbmil lea juohkit sámi servodahkii dieđuid gálvomearkkain ja movttiidahttit duojáriid ja sámi fitnodagaid ohcat gálvomearkaliseanssa.
Gaskavahkku almmuhuvvo sámi gálvomearkka -prošeavtta oktavuođas ođasmahttojuvvon neahttasiidu.
Prošeaktajođiheaddji Reetta Tornensis lohká leat dehálažžan ahte neahttasiiddut doibmet bures vai sápmelaččain lea álki gávdnat dieđuid gálvomearkkaid birra, ohcat liseanssaid ja ahte maiddái olggobeale olbmot gávdnet duojáriid ja sámi fitnodagaid.
– Mii ávžžuhit laktit ohcamuššii čáppa ja alladásat govaid vai dujiin oažžu buoremus vejolaš ipmárdusa ja gova. Lea dehálaš ahte neahttasiiddut geasuhit ja ahte olbmuin lea álki gávdnat dieđuid gálvomearkkain ja ohcat liseansasertifikáhtaid. Dát lea dehálaš vai gálvomearkavuogádat doaibmá vuogálaččat ja bálvala sámi servodaga, dadjá Tornensis preassadieđáhusas.
Iežas profiila
Ođasmahttojuvvon neahttasiidduin lea diehtovuođđu gos gávdnojit sihke duojárat ja sámi fitnodagat.
Sihke Sámi Made ja Sámi Duodji – mearkka liseansageavaheddjiin lea neahttasiiddus iežas profiila gosa sii sáhttet lasihit govaid iežaset dujiin ja čállit dieđuid iežaset fitnodaga birra, dujiid dahje buktagiid birra.
