Bearjadaga almmuha Davvi Álbmogiid guovddáš ođđa neahttaportála Davvi-Tromssa mearrasápmelaččaid birra.
Bearjadaga almmuha Davvi Álbmogiid guovddáš ođđa neahttaportála Davvi-Tromssa mearrasápmelaččaid birra.
Davvi Álbmogiid guovddáš Gáivuonas, almmuha ođđa neahttaportála Davvi-Tromssa mearrasápmelaččaid birra bearjadaga.
Dan oktavuođas bovdejit doaluide guovddážii, prográmmas lea earret eará kultuvrralaš ovdanbuktin, ovddeš beaivválaš jođiheaddji Mona Solbakk, guhte dál jođiha NRK Sámi, boahtá ges muitalit portála duogáža birra.
Čohkken dieđuid
Mo málestan guhppármáli? Mo gođán ránu? Makkár mearrasámi dáidda ja musihkka gávdno? Gii lei rávga? Gávdnojit go doalut dahje kurssat maidda sáhtán searvat?
Dáidda ja eará gažaldagaide, gávnnat vástádusa jus galledat Davvi álbmogat – Mearrasámit portála, senterfornordligefolk.no siiddus gávnnat dan bearjadaga rájes.
– Mii leat čohkken dieđuid mat gávdnojit, muhto maiddái ráhkadan olu ođđa ja miellagiddevaš sisdoalu mat čalmmustahttet mearrasámi kulturárbbi sihke čállosiid, govaid ja videoid bokte, čállá Davvi Álbmogiid guovddáš preassadieđáhusastis.
Geavaheaddjit besset ieža maid juohkit dieđuid
Heahpu, jávohisvuohta ja riiddut – rámisvuohta, čábbodat ja ealáskahttin. Mearrasámi kultuvrras leat olu kontrásttat.
Portála bokte beassá oahpásnuvvat Davvi-Tromssa mearrasámiid kultuvrii ja historjái, muhto čájeha maid ahte lea ain ealli kultuvra ja ain ovdáneamen.
– Olbmot bovdejuvvojit maid juogadit iežaset vásáhusaid, muitalusaid, ráhkadanneavvagiid ja nu ain viidásat, čállá guovddáš.
Portála lea boađus pilohtaprošeavttas man Davvi Álbmogiid guovddáš lea jođihan.
Guovddáš čállá ahte dat sáhttá leat álgu stuorábuš digitála prošektii, mii čalmmustahttá davvi álgoálbmogiid kulturárbbi sihke riikkadásis ja riikkaidgaskasaččat.
