Norggas oastá almmolašvuohta gálvvuid ja bálvalusaid 740 miljárdda kruvnna ovddas jahkásaččat. Dál evttoha ráđđehusnammaduvvon láhkalávdegoddi rievdadit lága mii stivre gálvooastima. Ealáhusministtar bargagoahtá oažžut ođđa lága jođánit sadjái.
– Ráđđehus lea čielgasit dadjan ahte galgat rievdadit almmolaš gálvohahkama njuolggadusaid ja geavatlaš barggu. Mii leat juo dahkan historjjálaš rievdademiid. Dálkkádat- ja birasvuhtiiváldin galgá ođđajagi rájes mearkkašit 30 proseantta ja Norggamálle sihkkarastá duođalašvuođagáibádusa buot almmolaš háhkamiidda, lohká ealáhusministtar Jan Christian Vestre.
Son lasiha:
– Almmolaš ja priváhta aktevrrat dárbbašit njuolggadusaid maid lea álki áddet ja mat leat olámuttos. Seammás ferte ođđa njuolggadus doarjut dehálaš ulbmiliid nu ahte «sosiála bálkesteapmi» ja bargokriminalitehta nohká, nu ahte šaddet buori bálká- ja bargoeavttut, oahpahalliid geavaheapmi, ceavzilvuohta ja árvoháhkan miehtá riikka. Nu šattašii ovttadássásaš gilvoeavttut buot duođalaš aktevrraide.
Láhkalávdegoddejođiheaddji Halvard Haukeland Fredriksen geigii odne ealáhusministarii nuppi dan guovtti guorahallamis, čállá departemeanta preassadieđáhusas. Vuosttaš guorahallamis leat evttohusat earret eará ođđa njuolggadusaide. Buohkat sáhttet sáddet cealkámuša vuosttaš guorahallamii ja áigemearri lea guovvamánu 10. beaivvi 2024. Nubbi guorahallan man áigemearri lea miessemánu 4.beaivi 2024 ja das lea fáddá buhtadus, hilgun ja geográfalaš doaibmaguovlu. Dasa lassin maid báikkálaš ja guovllu gálvolágideaddjit.
