Lágideaddji ávžžuha váhnemiid geain leat mánát vuollel 14 jagi, vuolgit ieža fárrui Isac Elliott konsertii Guovdageainnus.
Musihkkafestivála buvttadeaddji Nils Johan Vars lohká iežaset dál láhtti bidjan Báktehárjái ja ráhkkaneame sihkarvuođadoaimmaid gaskavahkkui, go de boahtá Suoma supernásti Isac Elliot Guovdageidnui.
Máŋgalogi fávtta
Vars vehá ballá ahte nieiddažat vilvet bearehaga dán 14- jahkásaš Issáha maŋŋái. 15 Securitasfávtta, nuppelohkái eaktodáhtolačča ja vel 20 Øytun oahppi galget doalahit ortnega dan eahkeda konsearttas. Maiddái 6 rukses ruossa bargi galget leat doppe.
– Gehččiid sihkarvuođa dáfus leat mis rinddit ovddabealde lávddi ja mis leat vávttat sihke siste ja olgun. Vuosttažettiin leat vávttat olgun, go vuordit ahte čoahkkanit olu fánssat dohko. Vuordit maid ahte čoahkkanit hui olu olbmot lávddi ovddabeallái, ja danne leat mis doppe eanas fávttat.
Vuollel 14- jahkásaččaid
Vars muitala ahte sii rahpet uvssaid diimmu ovdal go konsearta álgá, vai olbmot galget muosis beassat sisa ovdal go konsearta álgá. Son váruha dál váhnemiid sáddemis mánáid okto konsertii, goit sin geat leat vuollel 14 jagi.
– Mii nagodit dieđusge sihkarvuođa doalahit doppe ovddageahčen, muhto mii eat sáhte váhnema rolla váldit. Jus beare nuorra mánáid sáddejit dohko, ja erenoamážit jus mánná lea vel erenoamáš áŋgir beassat Isac Elliota lahka, lea dehálaš geahččat sin bearrái doppe, dadjá Vars.
Unnimusaiguin bajás
Vars ja su veahka leat ráhkkaneame dasa ahte šaddá riežas ja báhkka nuorra ellioteersaide. Son ii loga sáhttit dasa maidege jus álget meanáhuvvat, muhto čáhci gal galgá sadjagasas.
– Ii leat dieđusge jur vihttalot duhát-konsearta, go leat dušše nuppelot čuođi olbmo dohko, muhto goitge, mis leat sihkarvuođa doaimmat. In ge jáhke gal šaddat nu gárži eambbo jur ovddageahčen, muhto mii rahpat tribuna badjin vai unnimus gehččiide lea vejolašvuohta oaidnit lávddi.
Bileahta lonuhit giehtabáddin
Lea dáhpáhuvvan ovdal ahte garra fánssat fáktejit ija beaivvi násttiid, muhto Vars gal bivdá nuoraid váldit gulul.
– Erenoamážit jus lea galmmas, de ii leat buorre olgun vuordit guhká ja galbmot. Ii ge leat oba dárbu ge vuordit olggobealde. Eai busset Álttás ja Leavnnjas ge boađe ovdal njealji áigge, dadjá Vars.
Son ávžžuha baicca olbmuid áigá juo mannat lonistit bileahta giehtabáddin.
– Go jus uvssa lusa boađát báhpiriin mas lea bileahtta, de šaddá goige jorggihit ja lonuhit dan giehtabáddin festiválakantuvrras. Báhpiriin ii beasa sisa, čilge Vars.
Lágideaddji ii muital goas Isac Elliot boahtá, ii ge dan gos dahje man guhká galgá orrut. Dat lea artistta sihkarvuođa dihte.
