Suoma beakkálmas Isac Elliot konsertii, mii lea otne Sámi musihkkafeastiválas Báktehárjjis, dohko eai beasa ii oktage mediaásahus.
Isac Elliot leige diibmá beassážiid maid Guovdageainnus, muhto dán jagi eai beasa media gokčat konsearta.
Ii feastivála mearrádus
Sámi musihkka feastivála buvttadeaddji Nils Johan Vars lohká dat lea Isac Elliot ja su joavkku iežaset mearrádus.
– Mii eat leat vel ožžon vástádusa manne eai hálit media konsertii, muhto go ollejit Guovdageidnui de oažžut čielgasa manne leat nu dáhkkán, lohká Vars.
Doahttalit násti
Vars arvadálla ahte Elliota joavkkus lea juoga ulbmil mediagildosiin, ja jáhkka sis lea juogalágaš plána das. Son ii loga Sámi musihkafeastiváli váikkuhit mediagielddus movtge.
– Dat ii leat dramatihkalaš midjiide, ja mii eat vuoittáhala movtge, go ii han dat šat váikkut bileahttavuovdime. Mii gal doahttalit dan go dákkár stuora násti buktá sávaldagaid midjiide. Konsearta lea sin hálddus ja mii gal luohtit ahte Elliota joavkkus lea hárjáneapmi stuora konsearttaid čađahit, ja maiddái ieža govvejit ja filbmejit konsearttas, lohká Vars.
Amas midjiide
Vars lohká sii eai leat nu hárjánan dákkár stuora násttiiguin ovttasbargat, ja danne orro dákkár gielddus hui imáš.
– ii leat nu dávjá mii lea ovttasbargame dákkár stuora máilmmi násttiiguin, geaidda buot lea lunddolaš, maiddái media gieldit boahtimis konsertii.
Eai nu ollu go diibmá
Bileahtta johttu ii leat seamma buorre diimmáš Isac Elliot konsertii.
– Ii leat nu bures go diibmá, muhto otne leat vuovdán bures bileahtaid, ja orro dego dat Guovdageainnu fenomena ahte vuordit diŋggaiguin maŋemus lohppii, lohká Vars.
