Alimus agis

The big thirty, huff. Muittán go ledjen viđanuppelot-jahkásaš de jurddašin ahte dien agis gal olbmos lea visot sajis; moadde máná, isit, beana, stohpu ja biila. Ja go golbmalot jagi deavdá, ammal de gal lea albma ollesolmmoš, ja várra oalle láittas. Nie mun dal lávejin govahallat dieid ahkehaččaid.

Muhto dál go diet lohku lahkonišgoahtá de ii leat buot gal áibbas sajis.

Jua, mánná mus gal lea, biila maid ja stohpu. Beana ii gal leat, in ge dan gal oba fuola ge go mun in gierdda beatnagiid. Isit datte ii gal leat, muhto eai dat oidno nu máŋggas mu ahkehaččain náitalan, nu ahte ii dieinna ge leat datte nu hoahpu.

Ja albma ollesolmmoš?

Naaaa, in mun dal dien gal diehtán. Oaivve siste in oro áktánasat rievdan dan rájes go ledjen 16-jahkásaš ja dovden iežan leat alimus agis. Rievtti mielde lean álot dovdan iežan leat alimus agis, guđe agis dal de leaččan ain leamaš. (Earret go die go ledjen 21-22 jahkásaš ja veahá panihkka lei čuožžilan go in diehtán manin galggašin šaddat go de šattan ollesolmmožin. Dalle gal dovden ahte lean nu boaris ahte bággu lea muhtinlágan karrieara birra smiehttagoahtit).

Na ainjuo, ruovttoluotta fas áššái. Albma ollesolmmoš? Jus albma ollesolmmoš galggaš láibut, duddjot, káfe juhkat ja geahččat Dagsrevyena juohke beaivve, de gal in leat ollesolmmoš.

«In juga káfe, illá máhtán gárvves pusedáiggiid bidjat, dan dihtet sii geat leat gusson mus gáhkuid ja duddjot lean oalle láiki. Ii ge Dagsrevyen gal oidno dán dálus beare dávjá.»

Ferten dattege gal mieđihit ahte muhtumin guldalan «Ekko» radioprográmma NRK P2:s, ja Dagsnytt18 seamma kanálas, muhto dat boahtá das go mus lea biillas álot P2 kanála alde.

Jájá, ii dat big thirty soaitte leat nu váralaš liikká.

Go jo mus 6-jahkásaš siessal čakčat jearai ahte goas mun šattan albma ollesolmmoš, nu mo su váhnemat. Ja mu 4-jahkásaš ges logai duo go jerren maid munnje áigu juovlaskeaŋkan addit, ahte eai stuorra mánát oaččo skeaŋkkaid.

Ammal de neavttán leat oalle nuorran, ainjuo muhtimiidda.