Bargiidbellodaga njunuš lohká iežaset vuoruhit nuoraid boahtte áigodagas, ja láhčit sidjiide buoret dilli.
Bargiidbellodaga njunuš lohká iežaset vuoruhit nuoraid boahtte áigodagas, ja láhčit sidjiide buoret dilli.
– Nuorat leat dieđusge guovddážis, sii lea vuođđun ahte gilážat sáhttet bisuhuvvot sihke Gáivuonas ja muđui Norggas, lohká Gáivuona báikkálaš Bargiidbellodaga sátnejođiheaddjievttohas.
Bargiidbellodat háliida nannet ásahandoarjaga nuoraide geat háliidit álggahit ođđa ja árbevirolaš ealáhusaid, seammás go háliidit vuoruhit ealáhusovdánahttima suohkanis.
Politihkalaš hárjáneapmi nuorravuođas
Trond Skotvold lea aiddo fárren Gáivutnii, maŋemus jagiid lea orron Romssas gos lea bargan ealáhusaid váldoorganisašuvnnas, ja dál lohká gearggusin lávket suohkanpolitihkkii.
– Mus lea politihkalaš hárjáneapmi nuorravuođas, dalle áŋgiruššen politihkas. Lean bargan ollu, nu ii leamašan áigi politihkket, muhto barggu oktavuođas lean háhkan ollu politihkalaš vásáhusaid. Dál šaddá miellagiddevaš áigodat, muitala son.
Háliida doalahit mannan válgabohtosa
Trond Skotvold muitala maŋemuš válggas oaččui Bargiidbellodat 48 proseantta jienain Gáivuonas, ja hállu lea lasihit jienaid boahtte čavčča.
– Mannan áigodaga logut ledje hui buorit, ja áigut dieđusge bargat dan olis doalahit logu, muhto seammás háliidat vel eambbo jienasteddjiid háhkat, lohká son.
Doalahit dálá skuvlastruktuvrra
Dán áigodagas lea skuvlaášši leamašan guovddážis Gáivuona suohkanstivrras, dál leat mearridan giliskuvllaid bisuhit ja Bargiidbellodaga sátnejođiheaddjievttohas lohká iežas bargat dan nammii ahte nu gártet maid boahtte áigodagas.
– Háliidat doalahit dálá skuvlastruktuvrra, dadjá son.
Bargat oktasaš ulbmila guvlui
Trond Skotvold lohká dovdat Gáivuona suohkana bures, vaikko ii leat orron suohkanis.
– Mus leamašan čanastagat suohkanis badjel 25 jagi, ja eaiggádušan smávvadálu ja nu lean oaidnán makkár hástalusat suohkanis leat ja mainna lea dehálaš bargat. Suohkanis lea njeallje giláža ja mus lea hállo oččodit buohkaid ovttasbargat ja gávdnat oktasaš ulbmila mainna sáhttit bargagoahtit, lohká son.
Gáivuona Bargiidbellodaga válgaprográmma lea gárvvis, ja sin váldočuoggát leat buorit fálaldagaid boarrásiidda, dálá mánát leat Gáivuotna boahtte áigi, Láhčit ássan- ja kulturbirrasa olles suohkanii ja ovdánahttit Gáivuona servodaga.
Ášši almmuhuvvui vuosttaš geardde 18.04.2015
