Koronadilli sáhttá dagahit lossa jurdagiid lossadeabbon studeanttaide. UiT-dutkit háliidit veahkehit studeanttaid iežasveahkehan-appain. Seammás áigot guorahallat mo appat doibmet.
UiT-dutkit áigot guorahallat sáhttet go iežasveahkehan-appat ávkin studeanttaid árgabeaivvis eastadit lossa jurdagiid.
Appain galget veahkkeneavvut maiguin galgá oahppat hálddašit huša ja eastadit ja unnidit deprešuvnna ja garra balu dávdamearkkaid.
– Ovddeš guorahallamat leat čájehan ahte eanet nuorain leat psykalaš váttut, go dat geain leat diagnosat. Dál koronaáiggis, goas eambbosat leat eambbo okto go ovdal, de orrot dakkár váttut lassáneamen olusiin. Mii álggaheimmet dán prošeavtta vai sáhttit veahkehit dál ja dás, lohká Kristin Benjaminsen Borch preassadieđáhusas. Son lea UiT servodatmedisiinna instituhta vuosttašamanueansa.
Borch lohká ulbmilin leat ahte appat galget veahkehit sin geat leat várrajoavkkus, smávva doaibmabijožiiguin maid bokte soitet álkibut birget váttes áiggiid čađa.
Son jođiha prošeavtta man leat gohčodan «E-helse: studenters håndtering av isolasjon under korona pandemien med selv-hjelps app.» Dutkan lea oassi olu stuorát prošeavttas mas lea namma «Sunne valg for alle»
Sávvet 100 studeantta geahččalit
Appat leat jo almmuhuvvon, muhto dutkit háliidit ahte studeanttat, geat dál leat hearkkes dilis, galggašedje geahččalit daid ja muitalit maid sii oaivvildit daid appaid birra. Dutkit háliidit diehtit leat go appat heivehuvvon nuoraide, doibmet go ja mii livččii sáhttán buoriduvvot. Ulbmil lea ahte nuorain galggašii buorránit psykalaš dearvvašvuohta.
Danne sávvet dutkit rekrutteret čuođi studeantta geavahit appa golbma mánu. Studeanttat galget deavdit gažaldatskoviid go leat gollan golbma, guhtta ja guoktenuppelot mánu. Buohkat geat servet ožžot 200 ruvnno árvosaš skeaŋkakoartta, ja leat mielde vuorbádeamis mas sáhttet vuoitit divrasat skeaŋkakoartta.
Borch muitala iežaset áigut geahččalit guokte appa; Smart ja MCT & More ja dain leat iešguđet veahkkeneavvut maid bokte oažžu neavvagiid ja hárjehusaid mat galget veahkkin stivret jurdagiid, dovdduid ja iežas láhttenvuogi.
Prošektii sáhttá searvat dáppe.
