Go olbmot ožžot eanet máhtu luondduriggodagaid birra, de galgá leat vejolaš ásahit bargosajiid main lea vuođđu luondduriggodagain.
Go olbmot ožžot eanet máhtu luondduriggodagaid birra, de galgá leat vejolaš ásahit bargosajiid main lea vuođđu luondduriggodagain.
Nu oaivvilda Guovdageainnu meahcceguovddáža ovdaprošeavtta jođiheaddji, guhte bovde olbmuid čoahkkimii ihttin, duorastaga. Čoahkkimis ovdanbuktet ovdaprošeavtta meahcceguovddáža ásaheamis, ja galgá digaštallot movt bargat viidáseappot.
Ollu resurssat luonddus
Lea Ávjovári luonddugáhttenlihttu mii lea álggahan barggu, ja ovdaprošeavtta jođiheaddji, Svein Lund, muitala meahcceguovddáža ulbmil lea hukset guovddáža mii galgá leat veahkkin nannemis olbmuid luonddumáhtu, luonddugeavaheami ja luonddusuodjaleami. Seammás dáhttot hukset bargosajiid mat buorebut suodjalit luonddu ja váikkuhit dasa ahte jierpmálaččat ávkkástallat luonddu, dan sadjái go billistit luonddu.
– Mis leat hui ollu luondduriggodagat, sihke borramušat ja dálkasat, nu movt ovdamearkka dihte muorjjit, guolit, šattut ja guobbarat. Olbmot dieđusge máhttet ja movt daid dábálaččat ráhkada, muhto muđui lea unnán máhttu movt daid galgá ráhkadit.
(Ášši joatká gova vuolábealde)
Vejolaš bargosajiid ásahit
Danne ohcetge sii olbmuid geain lea máhttu iešguđet luondduriggodagaid birra geaiguin sáhttet ovttasbargat, ja maiddái olbmuid geain lea hállu oahppat dáid birra.
– Guovddáža jurdda lea ahte galgat doallat kurssaid luondduriggodagaid birra, ja nu movttiidahttit olbmuid geavahit eanet luonddu. Vuosttažettiin ohppet geavahit luondduriggodagaid iežaset atnui, ja jus lea dáhttu, de sáhttá dat maid movttiidahttit soapmásiid álggahit gávppi ja bargosajiid háhkat das, lohká Lund.
– Dáppe maid vejolaš
Lund muitala eará guovlluin dákkár sullásaš meahcceguovddážiid ovttasbargat olbmuiguin geat ráhkadit borramušgálvvuid ja dálkasiid.
– Dan lea Guovdageainnus maid vejolaš, oaivvilda son.
Riikkaidgaskasaš ovttasbargu
Lund lohká Sámis lea árbevirolaš máhttu luondduriggodagaid birra, muhto eat ábut doaivut mii máhttit buot.
– Erenomážit ođđa buktagiid fuobmámis ja ráhkadeamis ii leat mis nu ollu máhttu. Ruoššas lea ollu máhttu luondduriggodagaid geavaheamis, ja maiddái Suomas. Dat ii leat nu dovddus Norgga bealde ja mii áigutge singuin geahččalit oažžut ovttasbarggu, lohká son.
Dárbbašit olbmuid
Buot daidda bargguide dárbbašitge meahcceguovddážis olbmuid geat leat mielde hábmemis plánaid ovddasguvlui.
– Danne leage buot deháleamos ahte olbmot bohtet čoahkkimii ja čájehit dasa beroštumi, go moatti olbmos gal ii šatta guovddáš, lohká meahcceguovddáža ovdaprošeavtta jođiheaddji, Svein Lund.
Ovdaprošeakta lea ožžon doarjaga Guovdageainnu suohkanis, Finnmárkkuopmodagas, Finnmárkku Luonddugáhttensearvvis, Norgga Luonddugáhttensearvvis.
Čoahkkin lea čakčamánu 1. beaivvi Guovdageainnus LES-viesus.
