Stáhtahálddašeaddji ii oainne eará vejolašvuođa go diktit báhčit guovžža mii hearjida sávzaealus.
Njávdámis Mátta-Várjjagis dat lea guovža goddán sávzza ja lábbá, ja dan maŋŋel lea Stáhtahálddašeaddji mearridan addit lobi báhčit ovtta guovžža.
– Vahágat eai leat dál vuos nu stuorrát, muhto sáhttá šaddat vearrát. Mis leat vásáhusat ovddit jagiid vahágiiguin, čallá Romsa ja ja Finnmárkku Stáhtahálddašeaddji.
Sii čilgejit ahte mánnodaga suoidnemánu 24. b. oaččui Stáhtahálddašeaddji dieđu SNO:s sávzza birra man guovža lei goddán, ja sávzaeaiggát Trude Mikkola bivddii báhčinlobi. Sávzaeaiggát lei registreren ollu ráfehisvuođa ealu siste elektrovnnalaš vákšuma bokte, ja gávnnai maid lábbá mii duođaštuvvui goddon guvžii.
Stáhtahálddašeaddji čállá ahte dát guovlu gos ohce lobi báhčit, lea dehálaš geasseguohtun sávzzaide, gosa luitet 650 sávzza guovtti dálus. Guohtunguovlu lea B guovllus, muhto lea hui lahka A guovllu. Báhčinlobi guovllus eai leat registreren čivgaguovžža. Ii ge lean realisttalaš molssaeaktu čohkket sávzzaid eret guovllus ovdal áiggi. Sii eai ge jáhke dušše eastadeaddji doaimmaid sáhttit unnidit vahágiid maid guovža dagašii guovllus.
