Synnøve Persen oažžu Kulturráđi 2018 gudnebálkkašumi.
Norgga Kulturráđđi dieđiha preassadieđáhusas jagi 2018 gudnebálkkašupmi addojuvvo poehta ja govvadáiddárii Synnøve Persenii, su dáiddalaš barggu ovddas ja su áŋgiruššama loktet sámi dáidaga, sámegiela ja kultuvrra su guhkes dáiddalaš bargoáiggi.
Kulturráđđi mearridii čakčamánu čoahkkimis 25. beaivvi geiget Persenii sin 2018 gudnebálkkašumi. Jahkásaččat geige ráđđi gudnebálkkašumi olbmui gii lea «dahkan earenomáš mávssolaš barggu Norgga dáidda- ja kultureallimii». Bálkkašupmi lea 600.000 kruvnna.
Ráđđi ákkastallá ná:
– Persen lea su guhkes dáiddalaš bargoáiggi ja politihkalaš barggu bokte, leamaš mielde nannemin sámi identitehta ja loktemin sámi dáidaga riikkaviidosaččat.
