Romssas lassánedje koronabuohccit 29 olbmuin mannan vahkkoloahpa. Eanet skuvllat leat maid fáhtehallan njoammudávdii, oktiibuot 12 skuvllas lea duođaštuvvon koronavirus.
Mannan vahkkoloahpa fertejedje Romssas rahpat ođđa koronaiskanbáikki vai olbmot eai gártta máŋga beaivvi vuordit ovdal go besset váldit iskosa. Sálašvákki valáštallanhálla koronaiskanbáikái besset olbmot boahtit vaikke eai leat diŋgon diimmu ja vahkkoloahpas leat ge máŋga čuođi romsalačča iskan.
– Dál leat Romssas 108 olbmo isolašuvnnas. Mannan vahkkoloahpa leat oallugiid iskan ja bohtosat čájehit ahte lávvardaga ledje 15 ođđa koronabuohcci ja sotnabeaivvi ges 14, dajai Romssa suohkana váldodoavttir Kathrine Kristoffersen vuossárgga preassakonferánssas.
Romssa suohkan dáhttu ain čađahit olu covid-19 iskosiid vai nagodivčče bissehit leavvama.
– Buot deháleamos strategiija dán barggus lea čađahit olu iskosiid, bidjat olbmuid isolašuvdnii jus sis lea koronavirus ja guorrat buot sin lagas oktavuođaid vai sii ges mannet erremii, čilge Kristoffersen.
12 skuvlla
Koronavirus lea maŋimuš vahkku njommon olu nuorra olbmuide ja danin lea pandemiija stuora váikkuhussan skuvllaide. Oktiibuot lea koronavirus duođaštuvvon 12 skuvlla bargiin ja/dahje ohppiin.
– Selnesa, Storelva, Kaldfjorda, Ersfjordbotna, Straumsbukta, Luheima ja Sálašvákki mánáidskuvllain, Langnes nuoraidskuvllas ja Kongsbakken, Ishavsbyen, Sálašvákki ja Sállira joatkkaskuvllain lea duođaštuvvon koronavirus, muitala Kristoffersen gii muitala ahte skuvllain leat čađahan iešguđetge doaibmabijuid.
– Muhtin skuvllaid leat gidden, eará skuvllain ges leat muhtin oahppit ja bargit gártan erremii. Juohke skuvllas dahkkojit árvvoštallamat ja dan vuođul mearridit doaibmabijuid. Ovdamearkka dihte sáhttá leat dárbu giddet skuvllaid areálaid geažil dahje jus lea eahpesihkarvuohta njoammuma dáfus. Jus bargi dahje oahppi leamaš dušše ovttas ovttain luohkáin, de ges lea doarvái dušše sin bidjat erremii, dadjá Kristoffersen.
Fuolastuvvan váhnemat
Romssa suohkana skuvllaid ossodathoavda Geir Olsen muitala ahte skuvllain vásihit buori ovttasbarggu ja sii ožžot buori čuovvoleami njoammuneastadanjoavkkus.
– Skuvllain leat buorit gearggusvuođaplánat ja skuvllain dieđihit ahte ožžot buori veahki sihke suohkana njoammuneastadandoaktáris ja njoammuneastanjoavkkus. Seammás muitalit skuvllaid rektorat ahte eanet váhnemat leat fuolas ja bargiid searvvis lassána jávkan. Skuvllaide lea hástalus gávdnat sadjásaččaid, lohká son ja muitalastá ahte lea dehálaš fállat oahpahusa skuvllain.
– Lea hirbmat dehálaš ahte mánát ja nuorat besset boahtit skuvlii ja muđui ge ovttastallat go servodagas muđuid ráddjejuvvojit doaimmat, lohká Olsen.
Jáhkká koronavirusa lassánit
Romssa suohkana váldodoavttir Kathrine Kristoffersen dadjá ahte čuovvovaš vahkkuid vurdet koronavirusa leavvat vel eanet.
– Čuovvovaš vahkkuid dáidá koronavirus njoammut vel eambbo skuvlamánáide, mánáidgárdemánáide ja bargiide. Dát dáhpáhuvvá danin go virusa inkubašuvdnaáigi lea 14 beaivvi, ja min doaibmabijut dárbbašit maid áiggi ovdal go dain oaidnit beaktilvuođa, lohká son.
300 miljovnna ruvnnu
Koronavirus lea šaddan divrrasin servodahkii ja Romssa suohkan lea dássážii geavahan masá 300 miljovnna ruvnnu pandemiija geažil.
– Ráđđehus lea olu ruđaid juolludan suohkanii, muhto mis váilu ain 68 miljovnna. Doaivumis oažžut maiddái dáid ruđaid vai eat dárbbaš eará surggiin seastit, dadjá sátnejođiheaddji Gunnar Wilhelmsen gii ain lea optimista vaikke koronabuohccit lassánit.
– Mii leat ráhkkanan dása bures ja mis leat buorit gearggusvuođaplánat mat doibmet. Mii birgehallat ovddos guvlui, dadjá son.
