Ráđđehus evttoha juolludit 57 miljovnna kruvnna gárvet Saemien Sijte Snoasas. Museadirektevra Birgitta Fossum illuda go dál viimmat orru vejolaš ahte sii sáhttet fárret Saemien Sijte ođđa museavissui juovlamánu 2021.
Norgga ráđđehus evttoha 2021 stádabušeahtas juolludit 57 miljovnna kruvnna gárvet Saemien Sijte musea- ja kulturguovddáža Snoasas. Dasa lassin evttoha ráđđehus juolludit 2,7 miljovnna kruvnna museadoaimma nannemii ja viessoláigui.
– Lea hirbmat buorre go ráđđehus evttoha juolludit 57 miljovnna gárvet museaviesu. Livččii lean šállošahtti jus eat livčče ožžon daid dán jagi. Oainnán maid ahte leat evttohan juolludit 2,7 miljovnna kruvnna museadoaimma nannemii ja viessuláigui. Eat mii beasa sisa fárret ovdal go loahpageahčen 2021, lohká Saemien Sijte museadirektevra Birgitta Fossum stuorra mojiin.
Vuođđogeađgi biddjojuvvo 13.10.2020
Saemien Sijte museadirektevra Birgitta Fossum muitala ahte golggotmánu logát beaivvi, tiibmu 12.00 fitná Norgga kulturministtar Abid Raja bidjamin Saemien Sijte ođđa museaviesu vuođđogeađggi.
– Maiddái sámediggepresideanta Aili Keskitalo boahtá, muitala Saemien Sijte museadirektevra Birgitta Fossum.
Lea Statsbygg mii fuolaha Saemien Sijte ođđa museaviesu huksenbarggu mii álggahuvvui 2020:s. Áigumuša mielde galgá gárvvis sisa fárret juovlamánu 2021:s. Museaviessu šaddá 1600 m2 stuoris ovtta dásis ja ceggejuvvo Horjemstangen njárgageahčái Snoasajávregáddái.
– Juovlamánu 2021:s oažžut mii viessočoavdaga. Mii leat plánen ahte rahpat jagi 2022 musea álbmogii ja ođđa čájáhussii dárbbašat ruđaid. Lean hirbmat ilus go dál lea doaivva ahte Saemien Sijte ođđa museaviessu huksejuvvo, lohká Saemien Sijte museadirektevra Birgitta Fossum.
