Nuoraidmagasiidna fállá sihke kultur-, ealáhus- ja valáštallanáššiid dán vuoru.
Iđut-lágádus almmuha dán jagáš njealját Š-bláđi.
Dán nummára sisdoallu lea earret eará:
Astrid Tuorda (19) lea artista, aktivista ja son bargá sámi mánáidgárddis. Son lea eret Randijauras, Jåhkåmåhkis. Su mánnávuođaruovttu lahka áigu Beowulf Mining ásahit ruovdemálbmaruvkke.
Kárášjoga nieida ja vuodjantaleanta Sandra Balto (15) hárjehallá 21 diimmu vahkus, ja golggotmánus šattai ge Norggameašttirin nuoraidluohkás.
Boazosámi nieida Elle Martine Eira (26) lea Guovdageainnus eret, ja bargá advokáhttan Oslos. Astoáiggis láve čiekčat spáppa.
Ellinor Skartland (20) bođii nubbin SOÁ-joavkkuin dán jagi Sámi Grand Prixas. Dál son neaktá «Muohtaoabbá» bihtás Beaivváš Sámi Našunálateáhteris. Deatnulaš Kristian Tapio (20) váccii musihkka-, dánsun- ja drámálinjjá Álttá joatkkaskuvllas. Son neaktá váldorolla Muohtaoabbá-bihtás Beaivváš-teáhteris.
Nuoraidmagasiinna divššár Ánne-Hedvig lea vástidan nuoraid gažaldagaid.
Š almmuhuvvo njelljii jahkái ja sáddejuvvo 1500 skuvlaoahppái 81 skuvllas. Š lea nuvttá ohppiide geain lea sámegiella skuvlafágan. Boahtte Š almmuhuvvo 2023 guovvamánu.
