Dán jagi oassálastet earenoamáš olu sámi artisttat Giron festiválas mii lágiduvvo maŋemus vahkkoloahpa geassemánus.
Giron festivála lea musihkkafestivála gos olu Ruoŧa artisttat servet. Earret eará lávlot Miss Li, The Ark, Newkid ja Malou Prytz Gironis.
Dan jagi oassálastet earenoamáš olu sámi artisttat Giron festiválas earret eará lávlot Hanna Nutti, Ingá Máiiá Blind, Veden joavku Sandra Wasara Hammare ja Ella Sikku.
– Mis lei lihkku go nu olu sámi artisttat háliidit searvat. Mis lea olu sierralágan oasseváldit festiválas ja lea seamma go sámi gávpot ja dat galgá vuhttot Gironfestiválas maiddái. Seamma olu go skuterat leat ja maiddái dálve- ja ruvkegávpot, muitala Girona festiválajođiheaddji Alex Olofsson.
Stuorámus doalut
Festiválajođiheaddji Alex Olofsson illuda erenomážit gullat sámi artistta Ingá Máiiá Blind gii rahpá olles festivála.
– Mis leat earenoamáš olu buorit artisttat dán jagi. Muhto illudan gullat sámi artistta Ingá Máiiá Blind Gironfestivála rahpandoaluin dadjá Olofsson. Giron festivála lea stuorámus doalut mat lágiduvvojit dáppe ja lea šaddan olusiidda árbevierrun. Nu mun illudan hirbmadit, muitala Giron festiválajođiheaddji Alex Olofsson.
Boares gávpotguovddážis
Girona gávpotguovddáža leat sirdime go ruvkedoaimmat viidot gávpogis. Lea maŋemus jahki go Giron festivála lágiduvvo dan boares gávpotguovddážis muitala festiválajođiheaddji Alex Olofsson.
– Festivála oktavuođas mii guođđit boares Girona. Čakčii Girona guovddáš sirdojuvvo ođđa gávpogii golbma kilomehtera eret. Soaitá maiddái šaddat veháš váivves dovdu go lea maŋemus festivála boares Gironis. Muhto mii sávvat lágidit «Dan ođđa Gironfestivála» boahtte geasi, muitala Alex.
Giron festivála lágiduvvo 30. beaivvi geassemánus gitta suoidnemánu 3. beaivái. Festivála lea lágiduvvon lagabui 20 jagi, earret go daid maŋemus jagiid korona pandemiija geažil.