Liigeruhta, 3 miljovnna ruvnno, galgá nannet Ruoŧa Sámedikki giellabargguid.
Ruhta galgá mannat Ruoŧa beale sámegielaid nannemii. Doarjja lea sámegielaid dikšumii ja giellateknologiija ovddideapmái.
– Lea historjálaš mearrádus, ahte nannet gielaid, dadjá Ruoŧa ráđđehusa kultur- ja sámeministtar Jeanette Gustafsdotter Ruoŧa ráđđehusa preassadieđáhusas.
Liigeruhta lea maiddái oassi Ruoŧa ráđđehusa stuoribuš juolludeamis natiovnnalaš unnitlogu gielaide. Plána lea oktiibut juolludit 90 miljovnna ruvnno unnitlogugielade boahttevaš golmma jagis, dieđiha Ruoŧa ráđđehus preassadieđáhusas.
