Čavgejit doaimmaid ja sihtet 800 olbmo mannat erremii maŋŋel go koronadávda njoammugođii hárjehallanbáikkis Hársttáin.
Hársttáid suohkan álggaha garra eastadandoaimmaid ja lea bidjan 800 olbmo erremii maŋŋel go koronadávda lea njommon ollugiidda ja vuolgán Family Sports Club báikkis Seljestadas.
Lávvordaga duođaštuvvui vel gávcci olbmos koronadávda, ja buohkat ledje leamaš hárjehallanbáikkis, mii dál lea gitta. Buohkat geat leat fitnan dán hárjehallanbáikkis mánnodagas bearjadahkii fertejit mannat erremii, dieđiha Hársttáid suohkan iežaset neahttasiiddus lávvordateahkeda.
Doaimmat sáhttet guhkiduvvot
Álbmotdearvvašvuođainstituhtta gohčču suohkana gieđahallat dili dego livčče dat eŋgelas koronavirus mii lea leavvame, go eai vuos dieđe dan.
Giddejit vuot olles suohkana ja bidjet garra njuolggadusaid doibmii. Olbmot fertejit bargat ruovttuin ja njálbmesuodji galgá leat jus ii sáhte doallat gaskka. Dál eai sáhte leat eanet go vihtta guossi, ja eanemusat sáhttet logi olbmo leat priváhta ja almmolaš doaluin oktanaga, mat leat vistti siste.
Doaimmat galget bistit gitta njukčamánu 8.beaivvi rádjái, muhto sáhttet guhkiduvvot.
(©NTB)
