Nu gohčoda Vibeke Larsen dan go Nordkalottfolket ii lean mielas rievdadit vuođđolága.
Nu gohčoda Vibeke Larsen dan go Nordkalottfolket ii lean mielas rievdadit vuođđolága.
– Dat lea hirbmat 1980-logu politihkka. Mii han leat aitto meannudan sámedikkedieđáhusa riikkaidgaskasaš barggu birra, ja álgoálbmotvuoigatvuođat ja álbmotriekti lea sakka nannejuvvon maŋimuš logi jagis. Sámit leat definerejuvvon sierra álbmogin ruoŧa vuođđolágas, mis lea álgoálbmotstáhtus suoma vuođđolágas, ja de ii báze eará go Norga ja Ruošša olggobeallái, nu lohká Bargiidbellodaga parlamentáralaš jođiheaddji Sámedikkis, Vibeke Larsen.
Son čujuha dasa go Nordkalottfolket vuosttalda rievdadit vuođđolága.
Sámedikki dievasčoahkkin meannudii odne ášši mas dáhttot Stuorradikki rievdadit Vuođđolága paragráfa 108 sátnádeami, eanetlohku dáhttu maid vuođđolága jorgaluvvot sámegillii.
Áššiin leat dál geargan ja 32 áirasa jienastedje gáibidit vuođđolága rievdaduvvot, viđas ges jienastedje vuostá. Dat viđas gulle Nordkalottfolket ja Ovddádusbellodahkii.
Loga maid: – Ii leat dárbu rievdadit
Vuođđolága paragráfa 108 cealká nu mo dál lea:
«Lea stáhta eiseválddiid ovddasvástádus láhčit dili nu ahte sámi álbmotjoavku sáhttá sihkkarastit ja ovddidit gielas, kultuvrras ja servodateallimis»
Dien háliida Sámediggi rievdaduvvot nu ahte šattašii dákkárin:
«Lea stáhta eiseválddiid ovddasvástádus láhčit dili nu ahte sámi álbmot, riikka álgoálbmogin, sáhttá sihkkarastit ja ovddidit gielas, kultuvrras ja servodateallimis.»
– Hávkada dušši digaštallama
Larsen oaivvilda dán leat dehálaš áššin danne go rievdadus nannešii sámiid stáhtusa sierra álbmogin ja álgoálbmogin.
– Das ii soaitte nu stuorra juridihkalaš váikkuhus, muhto das lea stuorra politihkalaš vuoibmi go sápmelaččat vuođđolága bokte nannejuvvojit álgoálbmogin, nu hávkadat maid digaštallama dan birra ahte leat go mii álgoálbmogat vai eat, lohká son Ávvirii.
Son oaivvilda maid ahte lea dehálaš jorgalit vuođđolága sámegillii, go Norga lea vuođđuduvvon guovtti álbmoga territoria ala ja go dárogiella ja sámegiella leaba dásseárvosaš gielat.
Larsen datte ii dieđe vuos galggaš go láhka jorgaluvvot buot sámegielaide:
– Lea váttis dadjat, in duostta vástidit dies, jáhkán ahte álggos jorgaluvvošii davvisámegillii ja dasto daid eará gielaide maŋŋil.
