50 kubihka mopedain johtá miehtá Norgga

Čieža vahku áigi álggii Eirik Strandabø erenoamáš mátki Romssas ruoktot, Sunnmørii, mopedain.

Bártidii vuosttaš vahkus

Go Strandabø vulggii Romssas, lei mihttu joksat gaskaijabeaivváža Davvinjárggas. Dan ii dađi bahábut dahkan, go bárti jovssai.

 – Go ledjen vuolgán, de bártidin mohtoriin, ja lei bággu jorgalit. Dat dagahii ahte maŋŋonin, in ge ollen Davvinjárgii nu mo ledjen jurddašan, nu ahte in joksan gaskaijabeaivváža. Dat lei hui váivi, muhto ollejin dohko aŋkke veahá maŋŋelat go ledjen doivon, čilge son.

Njeallje diimmus Kárášjogas Guovdageidnui

Ovdal go Guovdageidnui bođii, lei finadan nuorta Finnmárkkus. Go mopedas ii leat nu stuora mohtor, de ii leat nu leahttu go mátkkošta.

 – Kárášjogas Guovdageidnui manai njeallje diimmu. Ii daga maide go ii mana nu jođánit, háhppehan ge oaidnit feara maid luoddaguorain, lohká Strandabø.

( Ášši joatká video vuolábealde)

Vaikko su mopedas ii leat leahttu eambbo go 45 km/dii, de lea Eirik Strandabø mielas dat hui miellagiddevaš.

Galmmas, muhto miellagiddevaš

Go Finnmárkkus mátkkošta čakčat, beassá gal vásihit čoaskása. Dan duođašta Strandabø.

 – Lean hui bures gárvodan go ain vuoddján. Ferten ge doamihit dáppe eret ovdal vel čoaskásat šaddá. Soaitá buoret ollet lullelii ovdal muohta vel boahtá, boagusta son.

 – Vaikko lea čoaskkis muhtimin, de lea dá juoga mii mu mielas lea hui suohtas. In liiko dábálaš barggu, nu ahte danne lean válljen vánddardit ná.

Ruoktot juovllaide

Go Guovdageainnus vuolgá, áigu finadit Romssas, Lofuohtas, Nordlánddas ja Troandimis. Dáin báikkiin áigu háhppehit fitnat ovdal juovllaid.

 – Vuosttaš gávpot gosa bisánan lea Romsa, ja dohko manná sullii guokte beaivvi go vuolggán Guovdageainnus. Nu ahte ferten rehkenastit buori áiggi go galggan juovllaide ollet ruoktot, loahpaha Eirik Strandabø.