Diibmá diŋgojuvvojedje lagabui 4,6 miljovnna idjadeami Norgga ruovttuin dahje astoáigeviesuin Airbnb, Booking.com, Expedia dahje Tripadvisor čađa, SSB dieđuid vuođul.
Dat lea alimus lohku dakkár idjademiin mii lea mihtiduvvon ovtta jagis, Statistihkalaš guovddášdoaimmahaga (SSB) dieđuid vuođul. Buohtastahttin dihte lei lohku 2,8 miljovnna 2021:s ja 4 miljovnna 2019:s.
Dan 4,6 miljovnna idjadeamis diibmá ledje 2,9 miljovnna olgoriikka guossi, mii lea golmma geardde eambbo go jagi ovdal. Ledje eanemusat Duiskka ja Amerihká turisttat mat dagahedje lassáneami.
– Goargŋun 2021 pandemiija maŋŋel lei vurdojuvvon, ja olgoriikka idjadeamit olahedje seamma dási go ovdal pandemiija, dadjá SSB ráđđeaddi Boyd Oyier preassadieđáhusas.
Norgga ja Eurohpá gussiid idjadanlohku diibmá lei alit go 2019:s, seammás go Ásia ja Amerihká idjadeamit eai leat vel seamma dásis go ovdal pandemiija lei.
Olgoriikka idjadeamit lassánedje buot fylkkain. Lassáneapmi lei stuorámus Vestlánddas, gos idjadanlohku lei 466 000, ja Oslos fas 414 000 eambbo idjadeami.
©NTB
