Oktiibuot 18 olbmo sáhttet šaddat gillát ráŋggáštusaid maŋŋil go Vearroetáhta lea bearráigeahččan Onlyfans-neahttasiiddu.
Onlyfans lea bálvalus mas fállet erohtalaš sisdoalu mávssu ovddas.
Vearroetáhta lea dárkkistan 26 profiilla neahttasiiddus dienasáigodagas 2019–2021, čállá VG.
Oktiibuot lea sáhka gávppašeamis badjel 22,1 miljovnna ruvnno ovddas mii ii leat almmuhuvvon Vearroetáhtii.
Divišuvdnadirektevra Odd Woxholt muitala aviisii ahte leat 18 olbmo geain lea oalle stuora gávpejohtu mii ii leat vearroetáhtii almmuhuvvon obanassiige.
– Stuorimus áššiid gaskkas okta mas lea gávpejorru gitta 4 miljovnna ruvnno ovddas maŋimus golmma jagis, dadjá Woxholt.
Son muitala viidásat ahte politiijat bohtet čuovvulit dan ášši gulaskuddamiin, muhto ii leat čielggas galle eará ášši politiijat bohtet čuovvulit.
