-Almmuhus-
-Almmuhus-
GUOIMMUHEAPMI 17-jahkásaš vahku vuoitin

17-jahkásaš vahku vuoitin

-

-

Lemet Johanas Nystad lea mannan vahku vuoiti Ávvira ealgabivdogilvvus. Dál álggii ge maŋimuš gilvovahkku, doama don ge searvat.

Lemet Johanas Nystad (17) lea vuorbáduvvon mannan vahku vuoitin Ávvira ealgabivdogilvvus.

Son searvvai gilvui misiin man bážii Beahcecaŋŋás, dat dettii 72 kilo.

 

Lonuhedje bivdoguovllu

Lemet Johanas beaivválaččat ássá Lillehammeris gos vázzá Norgga valáštallanjoatkkaskuvlla sabetnjuikunoahpus.

Ealgabivdoáigge lei son boahtán ruoktot čakčabivdui, ja muitala iežaset álggos ožžon Galmmatnussira bivdoguovlun, muhto doppe lei nu unnán ealga ahte besse sirdit Beahcecaŋŋái.

– Mun bivden vahkku njuolgut, ja doppe ledje olu ealggat, muhto mis ii lean báhcán eará go miessái vel bivdolohpi, ja mii oinniimet dušše sarváid ja ronuid, muitala son.

 

Guhká vurddii

Maŋimuš beivviid goittot lei son váccašeamen bivdoguovllus iežas váhnemiiguin. Sis leat guokte ealgabeatnaga, boares beana ja vielppesbeana.

Beaivvi ovdal lei vielppesbeana láhppán GPS-rusttega, ja bearaš lei ge rievtti mielde dan ohcamin.

– Moai letne áhčiin ovdal bivdán Beahcecaŋŋás ja diđiime ovtta sajis lávet leat olu ealggaid nu ahte vulggiime dohko. Ean lean várra vázzán eará go diibmobeali go áiccaime ealgga, muhto dat ii bisánan dasa, čilge son.

 

Máŋga diimmu bivddii

Lemet Johanas muitala ealgga mannan báhtui ja eará ealgabivdoguvlui, Gošjoga vel rasttildii.

– Muhto boaresbeana ii diktán dan nie mannat ja vieččai dan guktii fas munno lusa. Go de bođii dat ealga maŋit háve, de manai suohpážii in ge mun sáhttán báhčit. Beana lei nu jierbmái ja hárddii dan ealgga nu ahte bođii eret dan suohpážis nu ahte bessen báhčit, muitala nuorra bivdi.

Son muitala ahte ádjánii máŋga diimmu dieinna ealggain ovdal go beasai báhčit dan, ieš lei goittot duhtavaš:

– Dat lei oalle stuorra miessi, 72 kilo dettii, lohká son.

 

Ovddit vahku vuoiti: – In leat goassege beassan nie lahka báhčit

 

Searvva don ge!

Ávvir sávvá lihku Lemet Johanassii, ja jus don háliidat searvat, de gávnnat gilvvu dáppe.

Mii vuorbádat vahkkosaččat muhtima guhte vuoitá Ávvira t-báiddi, Ávvira ealgabivdi gaibagahpira ja mátketelefonveaskku man Finnmárkkuopmodat FeFo lea skeŋken gilvui.

Gilvu bistá golggotmánu 31. beaivái, dan maŋŋil vuorbádat váldovuoiti, ja vuoitun lea 5000 ruvdnosaš skeaŋkakoarta.

Losimus ealgga ovddas oažžu Ávvira ealgagonagasa dahje -dronnega gaibagahpira.

- Advertisement -
-Almmuhus-