Boahtte vahkkus álgá Ijahis idja festivála Anáris, duorastaga lágidit mánáid- ja nuoraidbeaivvi masa leat jo 150 máná dieđihan.
Boahtte vahkkus álgá Ijahis idja festivála Anáris, duorastaga lágidit mánáid- ja nuoraidbeaivvi masa leat jo 150 máná dieđihan.
Ijahis idja – eamiálbmogiid musihkkafestivála álgá boahtte vahku duorastaga 13.8. Festivála vuosttaš dáhpáhus lea Inger-Mari Aikio mánáid-cd “Ima Mánážat” almmustahttinkonsearta. Konsearta lea Sajosa auditorios ja dohko lea nuvttá sisabeassan. Konsearttas leat mielde buot lávlut, geat leat mielde cd:as, čállá festivála preassadieđáhusas.
Bearjadaga 14.8. mánáid- ja nuoraidbeaivi álgá seamma konsearttain. Konseartta lassin, bearjadatiđida auditorios čájehuvvojit oanehisfilmmat ja animašuvnnat. Ijahis ija násttážat –nuoraidkonsearttas loaiddastit mánáid ja nuoraid iežaset joavkkut ja rock-joavku SomBy.
Loga maid: Guđe gosa don vuolggášit?
150 máná dieđihan festiválii boahtit
Ijahis ija mánáid- ja nuoraidbeaivái leat almmuhan ovddalgihtii sullii 150 máná ja nuora birra Sámi.
Anára gielddas skuvllat álget easka Ijahis ija maŋŋá ja earret eará dan sivas mánáid- ja nuoraidbeaivi lea rabas buohkaide. Dáinna lágiin Anára gieldda, ja earáge gielddaid sámemánát- ja nuorat, geat eai boađe iežaset skuvlla mielde, besset maiddái oassálastit dáhpáhussii. Vánhematge leat dieđusge buresboahtán.
Ijahis idja –festivála ordnejuvvo Anáris jo guoktenuppelogát geardde. Dán jagaš fáddá lea Vilda duoddarat ja dainna temáin háliidit čalmmustahttit Eanodaga ja eará oarjjabeale sámeguovlluid luohteárbevieru ja ođđasut sámemusihka.
Festivála stuorámus násti lea ruoŧasápmelaš Jon Henrik Fjällgren musihkkajoavkkuinis. Fjällgren šattai johtilit hui bivnnut go vuittii mannan jagi Ruoŧa Talent –gilvvu, Talang Sverige. Dán giđa su cd-skearru Goeksegh (Jag är fri) vuvddii Ruoŧas golleskearru veardde. Fjällgren konsearta lea bearjadateahkeda Sajosa auditorios.
Olles prográmma gávnnat Ijahis ija ruovttusiidduin.
