Sámediggi juolluda «Kulturdoaimmat doarjjaortnegis» doarjaga golmma doibmii. Okta dain lea prošeakta «The vuogas Way».
Tor Mikalsen, Lásságámmi prošeakta The Vuogas Way ja Kokelv Live, ožžot Sámedikkis oktiibuot 240 000 ruvnno.
– Dat juolludeamit čájehit unna oasi Sámi kulturdoaimmaid valljivuođas. Lean ilus go servodat lea fas rahpasan maŋŋá corona-pandemiija, ja ahte min kulturbargit besset fas vásihit dábálaš árgabeaivvi, lohká sámediggeráđđi Maja Kristine Jåma preassadieđáhusas.
Nammaárbevierut, duodji ja festivála
Tor Mikalsen galgá dokumenteret njálmmálaš sámi nammaárbevieruid Davvi-Romssas. Ulbmil prošeavttain lea čohkket nu olu ovddešáiggi persovdnanamaid Ivggu guovllus go vejolaš, dieđiha Sámediggi preassadieđáhusas. Son oažžu 70 000 ruvnno.
Lásságámmi vuođđudusa prošeakta The Vuogas Way oažžu 145 000 ruvnno pilohtaprošektii mas leat ovcci Norggabeale, Ruoŧabeale, ja Suomabeale sámi duojára. Sii galget prošeavttas suokkardit doahpaga The Vuogas Way dipmadujiiguin, ja dujiid galget čájehit Márkomeanus.
Kokelv Live festiválii juolluda Sámediggi 25 000 ruvnno. Festivála lea mearrasámi gilážis Jáhkovuonas Hámmerfeastta suohkanis, ja dá lea nubbi geardi go dat lágiduvvo.
