Mánnodaga rájes áigu Oahppolihttu čavget bargoheaitaga ja váldá 1300 oahpaheaddji bargoheaitagii.
– Min miellahtut háliidivčče baicca vuostái váldit ohppiid klássalanjain maŋŋel geasseluomu. Muhto go KS vállje bidjat oahpaheddjiid bálkávuoittáhallin guđát jagi maŋŋálaga, de eat sáhte válljet, dadjá Oahppolihtu jođiheaddji Steffen Handal.
Handal lohká sin dál ráhkkanit guhkit áigge bargoheaitagii, ja dan signaliserejit go eai váldde eanet bargiid bargoheaitagii.
Odne lea Oahppolihttu dieđihan KS:i ahte mánnodaga, borgemánu 22. beaivvi, rájes váldet vel 1300 oahpaheaddji 14 suohkanis ja logi fylkkasuohkanis bargoheaitagii. Ovdalaččas leat váldán 45 bargi streikii Bergenis ovdal geasi.
– Váttes mearrádus
Handal deattuha ahte ii oktage galgga eahpidit ahte lei váttis lihttui mannat bargoheaitagii dán čavčča, maŋŋel diimmá streaikka ja maŋŋel máŋga pandemiijajagi, go skuvllat ledje gitta.
– Lei hirbmat váttes mearrádus, maid dieđusge eat livčče válljen jus KS čuoččuhusat ahte dán jagáš bálkášiehtadallamat leat leamaš buorit oahpaheddjiide, livčče duođat. Politihkalaš signálat ahte áigot nannet oahpaheddjiid gelbbolašvuođa, lea juste nuppeládje go boađus, go oahpaheaddjit geain leat guhkimus oahppu ja gelbbolašvuohta šaddet vuoittáhallin, dadjá Handal.
Heajut bálká
Son čilge ahte oahpaheaddjit geain lea njeallje jagi oahppu, ožžot heajut bálkká go eará virggiin main lea seamma guhkes oahppu, sihke almmolaš ja priváhta sektoris. Son lohká skuvlasuorggis oažžut buot heajumus bálkká oahpu ektui Norggas.
Sii geat váldojit bargoheaitagii, barget nuoraid- ja joatkkaskuvllain 14 suohkanis ja buot fylkkasuohkaniin earret Oslos. Davvi-Norggas leat bargoheaitagii váldán oahpaheddjiid geat barget Hársttáin, Bådådjos ja Romssas ja muhtin mánáidgárddiin Romssas
