Soai leaba čiŋadan ja juoigaba Isac Elliot lávlaga videos. Nu sávvaba beassat deaivvadit iežaska stuora násttiiguin Oslos.
Soai leaba čiŋadan ja juoigaba Isac Elliot lávlaga videos. Nu sávvaba beassat deaivvadit iežaska stuora násttiiguin Oslos.
“Jus beasašeimme dán vásihit fárrolaga, ja vel vuosttaš gearddi go letne doppe, livččii áibbas čilgetmeahttun. Moai háliidetne hirbmadit deaivvadit iežame idolaiguin!”
Nu čálliba 14-jahkásaččat Martine Charlotte Bæhr ja Elle Rávdná Näkkäläjärvi Guovdageainnus iežaska videoi mainna leaba searvan gilvui.
“Niehkobeaivi”
Dán NRK p3 gilvvus galgá hutkás vuogi mielde lávlut iežas favorihttalávlaga, filbmet dan ja sáddet Instagramii dahje Facebookai merkejuvvon #jegviltilrådhusplassen. De sáhttá vuoitit nuvttá mátkki oaivegávpogii, orruma, ovddemus ráiddus geahččat Vg-lista nuvttákonseartta Ráđđeviessošiljus ja vel vejolašvuođa deaivvadit násttiiguin lávddi duogábealde. Konsearta lea geassemánu 20.beaivvi.
Juoigaba
– Lávlla lea Isac Elliot lávlla “Save a girl” man letne vehá rievdadan ja juige vel doppe, muitala Martine Ávvirii.
Soai čálliba: “Ean lean nu hutkát, ja ádjáneimme guhká gárvet video, gávdnat vuos buori báikki, ja ádjána coggat gávtti. Leage siivui nkrp3, ollašuhte munno niegu!”
Garralágán fánssat
Martine ja Elle Rávdná leigga ge erenoamáš áŋgirat go Isac Elliot lei Guovdageainnus beassážiid, ja Martine beasai vel lávddi nala First Kiss-nieidan. Son lea maid leamaš Isac-konsearttas juo Oslos ja Levis.
Geahča video:
Martine gal lea juo girdibileahtta oastán Osloi, go lea bearrašiin vuolgime One Direction-konsertii, mii leat beaivvi ovdal Vg-listtu konseartta. Su stuorámus násti Isac Elliot galgá dieđusge ligget lávddi doppe.
– Ii daga maidege jus Isac Elliot ii boađe ge Vg-lista konsertii, go beasan goit su oaidnit beaivvi ovdal. Muhto livččii somá oažžut Elle Rávnná fárrui geahččat maid The Fooo, ja The Main Level- joavkkuid, go liikojedje daidda maid hui bures, dadjá son.
