-Almmuhus-
-Almmuhus-
KULTUVRA – WOMEX lea deaŧalaš sámi kultur­bargiide

– WOMEX lea deaŧalaš sámi kultur­bargiide

-

-

Norgga sámediggeráđđelahttu Henrik Olsen illuda go sámi artisttat leat válljejuvvon riikkaidgaskasaš lávdái WOMEX-festiválii dán vahkkoloahpa. 

Sámediggeráđđi lea addán doarjaga sámi komponisttaide vai besset searvat ovtta máilmmi girjámus musihkkafestiválii, mii dál dollojuvvo Suomas.

WOMEX – the World Music Expo – lea okta stuorámus riikkaidgaskasaš musihkkafestiválain. Festivála lágiduvvo jahkásaččat golggotmánus ja lea «world music» šáŋŋeris šaddan fierpmádatvuođđun. Dán jagi lágiduvvo festivála Tamperes Suomas golggotmánu 23. – 27. b.

Mátkedoarjagat artisttaide

Sámediggi čállá preassadieđáhusas ahte dán jagi lea Sámediggi addán doarjaga Sámi komponisttaid searvái 68.500 ru, ja 16.700 mátkedoarjaga Elle Márjá Eirai.

Andreas Fliflet, Elin Kåven Sámi komponisttaid searvvis ja Elle Márjá Eira servet maiddái paneladigaštallamii lávvardaga golggotmánu 26. b. mas fáddán lea luohteárbevierru ja dan moalkás historjá.

– WOMEX lea deaŧalaš arena sámi kulturbargiide ja Sámedikki mielas lea buorre go sii servet dán muttos stuorra riikkaidgaskasaš arenai. Dán jagi prográmma lea hui gelddolaš gosa máŋga min čehpiin leat ožžon saji, dadjá sámediggeráđđi Henrik Olsen.

Lávddis maiddái Vildá ja Wimme

Elle Márjá Eira searvá maid earret eará Showcase-prográmmii, mii lea sierra prográmma mas ođđa ja gelddolaš artisttat leat válljejuvvon riikkaidgaskasaš lávdái. Dán jagi Showcase-prográmmas leat mielde maiddái sámi taleanttat nugo Hilda Länsman (duo Vildá) ja Wimme Saari (Wimme & Rinne).

– Mii oaidnit ahte sámi musihkka ja kultuvra leat bivnnuhat maiddái riikkaidgaskasaš lávddiin. Mu illudahttá hui sakka dat go maiddái earát oidnet árvvu min kultuvrralaš ilbmademiin. WOMEX:ii searvan addá min taleanttaide buorre vejolašvuođa oažžut fierpmádaga, čájehit iežaset ja oahpásmuvvat eará artisttaiguin miehtá máilmmi, cealká Olsen preassadieđáhusas.

- Advertisement -
-Almmuhus-