Brihtalaš Stephen Williams, gii ovddasta Israel Premier Tech joavkku, vuittii Arctic Race of Norway sihkkelgilvvu.
Mannan vahkkus lágiduvvui Arctic Race of Norway gos máilmmi buoremus sihkkelastit gilvvohalle. Vuosttaš gilvooassi čađahuvvui Guovdageainnus Áltái, nubbi Álttás Hámmerfestii, goalmmát Hámmerfeasttas Ávanuorrái ja njealját ges Fálesnuoris Davvenjárgii.
Stephen Williams, guhte vuittii sihkkelgilvvu obbalaččat, lei maid falimus duolbmat goalmmát gilvooasi.
Itálialaš Cristian Scaroni ovddasta Astana Qazaqstan Team ja šattai nubbin Arctic Race of Norway gilvvus. Goalmmádin bođii amerihkálaš Kevin Vermaerke, gii ovddasta Team DSM-Firmenich joavkku.
10 jagi
Leat vássán 10 jagi dan rájes go Arctic Race of Norway lágiduvvui vuosttaš gearddi. Beaivválaš jođiheaddji Knut-Eirik Dybdal lea rámis ovttasbargguin mii leamaš sihkkelgilvvu guovddážis.
– Arctic Race of Norway lea lágiduvvon logát gearddi ja čájehuvvo ahte dá ii leat dušše máilmmi fiidnámus sihkkelgilvu, muhto dat sáhttá maid máilmmi váddámus sihkkelgilvu. Sihke dálki ja olahusat speadjalastet Arctic Race of Norway, mii čájeha man gáibideaddji lea čađahit internašunála sihkkelgilvvuid Norgga davimus oasis. Dan ii livččii vejolaš lágidit buori ovttasbarggu haga, lohká Dybdal preassadieđáhusas.
