-Almmuhus-
KULTUVRA Vurdet olu nuoraid Sámi allaskuvlii

Vurdet olu nuoraid Sámi allaskuvlii

-

-

Dál lea vuot dat áigodat go nuorat ohcagohtet dieđuid alitoahpuid ja oahppofálaldagaid birra. Dan oktavuođas rahpá Sámi allaskuvla uvssaid ja bovde álbmoga boahtit oahpásmuvvat oahpuide gaskavahku.

Rabas beaivi lea jahkásaš dáhpáhus ja lea dehálaš rekrutterenarena Sámi allaskuvlii. Olles ásahus lea ráhkkanan dasa, ja láhčá dili nu, ahte vejolaš ohccit besset oahpásmuvvat ásahussii. Rabas beaivi lea rabas buohkaide.

– Mun gal jáhkán ahte bohtet ollu olbmot ja jáhkán sis lea beroštupmi gullat min oahpuid birra. Jus háliida oahpásmuvvat allaskuvllain, de lea dá buot buoremus beaivi finadit dáppe, muitala allaskuvlaoahpaheaddji Mikkel Rasmus Logje

Čájehit filmmaid

Allaskuvllas leat iešguđet doalut rabas beaivvis ja Mikkel Rasmus ávžžuha olbmuid boahtit gáfestallat. 

– Mii áigut čájehit filmmaid maid min studeanttat leat ráhkadan. Juohke fágas lea maid sierra diehtojuohkinbeavdi mas muitalit iežaset oahpuid sisdoalu birra. 

– Mii lágidit maiddái gilvvu mas váldovuoitun lea giisá, muitala Mikkel Rasmus.  

Logje deattuha maid Sámi allaskuvlla árvvu servvodahkii.

– Lea hui dehálaš ahte nuorat dihtet makkár vejolašvuođat sis leat. Lean ieš leamas studeantan Sámi allaskuvllas ja dál lean barggus dáppe. Sáhtán bealistan lohkat ahte Sámi allaskuvla lea okta Sámi servvodaga geađgejulggiin ja rahpá ollu geainnuid go galgá bargomáilbmái lávket, loahpaha Mikkel Rasmus.

- Advertisement -
-Almmuhus-