Álttá suohkan vuordá koronaloguid lassánit vaikke lohket sis lea bajilgeahčču covid-19 dillái. Vuossárgga iđida leat 300 olbmo erremis ja 32 isolašuvnnas.
– Mii vuordit ahte eanet positiiva vástádusat bohtet, muhto mii oaidnit ahte sii geat leat erremis leat dagahan ahte mis lea šaddan buoret bajilgeahčču dillái, dadjá Áltá sátnejođiheaddji Monica Nielsen otná preassačoahkkimis.
Logut
Álttás lea vahkkoloahpas lassánan koronalohku. Bearjadaga bohte vihtta positiiva vástádusa, lávvordaga golbma ja sotnabeaivvi golbma. Ovcci olbmos lea čanastat Álttá nuoraidbirrasii ja guovttis leat boahtán ruksesriikkas. Oktiibuot lea 32 olbmui njommon ja leat isolašuvnnas, ja olles 300 olbmo leat erremis. Olusat leat maid beassan eret errenáiggis ja dán rádjái leat maid guovttis beassan eret erremis.
– Dilli dál lea nu ahte mis lea oalle buorre bajilgeahčču dillái. Mii diehtit stuorra oassi sis geaidda lea njommon lea čanastat guovtti olbmui geain duođaštuvvui korona mannan sotnabeaivvi. Olbmot leat čeahpit doallat errenáiggi, ja juohkit njuolggooktavuođadieđuid. Dat čájeha ahte systema doaibmá, dadjá Monica Nielsen.
Ávžžuhus
Mannan vahkus bođii diehtu ahte vahkkoloahpas maid sáhttet olbmot fitnat váldimin iskosiid. Lávvordaga fitne 89 olbmo váldimin iskosa ja sotnabeaivvi 69 olbmo. Sátnejođiheaddji Monica Nielsenis ávžžuha dattetge olbmuid fas ođđasit iskkahit iežaset.
– Vaikke mis lea bajilgeahčču dilis, de lea dehálaš ahte olbmot liikká fitnet iskkadeamen. Jus dovdá symptomaid fas maŋŋá go leat iskojuvvon, de fertet váldit fas ođđa iskosa. Dan lea dehálaš, dadjá Nielsen.
Rápmi
Nielsen muittuha olbmuid ođđa njuolggadusa birra mas boahtá ovdan ahte olbmot eai sáhte čoagganit. Ruovttuin ja priváhta doaluin ii leat lohpi eambbo logi olbmo čoagganit. Dat njuolggadus gusto gitta skábmamánu 26. beaivái.
– Politiijat leat dieđihan ahte eai leat leamaš makkárge rihkkumat dán rádjái. Securitas leat fas čađahan 13 dárkkisteami olggobáikkiin, eai doppe ge leat leamaš rihkkumat. Dat lea máilmmi buorre ja čájeha ahte servodat váldá dili duođalaččat, dadjá Nielsen.
Mánáidgárddit
Álttás leat maid guokte mánáidgárddi giddejuvvon dál. Guovtti bargis lea duođaštuvvon korona. Álttá ráđđealmmái muitala ahte mánáidgárddit rahppojit ihttá rájes.
– Lea bargiide njommon iige mánáide dahje earáide, dadjá Bjørn-Atle Hansen. Son maid muitala ahte Álttá dearvvašvuođabargit leat bisson dearvvasin olles dán áigodaga.
Koronalistu
Álttás lea maid leavvan korona-nammalistu sosiála mediain. Lei iFinnmark mii čálii ášši birra vuosttažin. Nielsen lohká son ii liiko dasa ja ávžžuha olbmuid heaitit juohkimis listtu.
– Dat sáhttá dagahit ahte olbmot eai duostta vuolgit iskkahit iežaset, seammás iige leat lohpi juohkit nuppi olbmo dearvvašvuođadieđuid earáide, ja das lea sáhka láhkarihkkumis. In liiko dasa, dadjá Nielsen.
