Birasbellodat Ruoná jahkečoahkkin lea cealkán ahte sii eai hálit bieggaindustriija Idjavuonduoddara Rástegáissá guvlui.
Bellodaga jahkečoahkkin celkkii mannan sotnabeaivvi, skábmamánu 29. beaivvi, ahte sii eai hálit ahte bieggafápmoindustriija huksejuvvo Idjavuonduoddarii. Dan celket gáhtten dihtii luonddu, boazodoalu ja sámi kultureanadaga, dieđiha bellodat preassadieđáhusas.
Cealkámusteaksta, man bellodat mearridii mannan sotnabeaivvi lea ná: – Grenselandet AS fitnodaga plánat cegget Davvi bieggafámorusttega Idjavuonduoddara-Rástegáissá guvlui fallehit sámi kultuvrra ja boahttevaš buolvvaid maid ferte hilgut. Guovllu luonddu- ja kulturárvvut eai soabat Grenselandet AS fitnodaga Davvi bieggafámorusttega ja oppalaččat bieggafápmohuksema plánain. Bieggafápmohuksemat goaridivčče Idjavuonduoddara-Rástegáissá guovllu boahttevaš buolvvaide. NVE (Norgga čáhcádat- ja energiijadirektoráhtta) ferte hilgut Grenselandet AS fitnodaga konsešuvdnaohcamuša hukset ja doibmet Davvi bieggafápmorusttega Rástegáissás guovllu luonddumáŋggabealatvuođa, boazodoalu ja sámi kultureanadaga erenoamáš mearkkašumi dihtii ja dasa lassin go dat lea okta daid stuorámus guovlluin gosa eai leat sisabahkkemat joavdan Norggas.
