Goas jiekŋa manná, lea giđa stuorámus dáhpáhus Deanuleagis, dat mearkkaša ahte luossabidvu láhkona. Olbmot leat vuorddašeame goas de sáhttet čoahkkanit Vuolle-Geavgŋái geahččat makkár fámut leat jođus go jiekŋa mánná.
– Olbmot vuorddašit goas jiekŋa lihkadišgoahtá ja manná, vai olbmot besset bivdigoahtit luosa. Juohke ovttas lea luossanealgi dán čázádagas go giđđa lahkonišgoahtá; «Goas de manná jiekŋa vai beassat varas luosa muosátit ja borrat». Nie dat lea dáppe, lohká historihkkár Aage Solbakk.
Ii leat lihkastan
Meteorologa dieđiha dán vahku šlahti ja idjabuollaša. Solbakk lohká son ii leat oaidnán jieŋa lihkastan velá ja lohká čoaska dálki mii dagaha dan.
– Lean gullan doppe badjelis Kárášjogas gal lea jiekŋa veaháš lihkkasan, muhto leat čoaska dálkkit ja mannan ija lei nullagráda, masá buolašgráda Hilláguras. Jus ná joatkašuvvá, de ii jiekŋa mana ovdal go boahtte mánu, lohká son.
Garra fámut
Olbmot čoahkkanit juohke jagi Vuolle-Geavgŋái geahččat go jiekŋa manná dakko meattá, ja leat nu garra fámut ahte jiekŋa stuorra geđggiid sirddaša. Solbakk muitala ovtta vásáhusa badjelaš 20 jagi áigi go jiekŋa lei buđđosan ja bárut ledje nu stuorrát ahte bohte badjel biila geainnuid ja geaidnu lei gitta guokte vahku.
– Vuolledeanus doppe bohtet gitta Deanunjálmmis deike geahččat Geavgŋás go jiekŋa manná, go dakko láve buđđosit jiekŋa, vai hearrán dat gal leat garra fámut jođus. Olbmot lávejit čoahkkanit káfestallat ja geahččat daid fámuid, go Badjedeanus ja Kárášjogas luovvana, jus de buđđosa Geavgŋá vuolde, de dulvá issorasat, dadjá son.
Luossaságat
Eai leat dušše fámuid maid olbmot leat boahtán geahččat ja govvidit Vuolle-Geavgŋás, muhto báikeolbmot čoahkkanit ságastallat luossaságaid.
– Luossabivdit čoahkkanit háleštit goas sáhttát suohpput njáŋggofierpmi dahje oaggugoahtit, makkár lei vássán jahki ja doaivut šaddat buorrán jahkin, nu leat dat luossaságat, dadjá son.
Goas jáhkát jieŋa mannat?
– Boahtte mánu álggus, go dálkkit leat dákkárat. Geavgŋá vuolábealde ii leat lihkadan jiekŋa ii sentte ge, in ge jáhke dán vahku gal mannat. Illá lea dulvan, ii leat nu olu ahte lea mearkkašanveara. Eai jogat ge leat šávvagoahtán nu go lávejit ovdal go leahkastit. Fanasgiettejohka gal lea leahkásan, muhto ii šáva nu mo láve. Mii fertet dás čohkkát ja nealgut dassážii. Lea nu ahte it galgga borrat diimmáš luosa maŋŋá beassážiid, vai máistá varas luossa albma láhkái, dadjá historihkkár Aage Solbakk.
