Dáiddajoavku Suohpanterror háliida doarjut Sirpmá skuvlla viidáset ja bisuha iežas beaiveboddosaš čájáhusa gitta čakčii.
Dáiddajoavku Suohpanterror háliida doarjut Sirpmá skuvlla viidáset ja bisuha iežas beaiveboddosaš čájáhusa gitta čakčii.
– Sirpmá skuvlla heaittiheapmi lea čielga dáruiduhttin ja čielga sámi guovllu goarideapmi. Dán láhkai goarrána sámeservvodat bihtáid mielde. Go olbmot bággehallet fárret eret mánáid dihte, de ii leat sámi gilážiin boahtteáigi, dadjá Jenni Laiti Suohpanterroris.
ČSV-lihkadusa vuolggabáiki
Sirpmá skuvllas lágiduvvui girjjálašvuođaseminára gos ČSV-doaba ásahuvvui 1972:s, nu ahte ieš báikkis lea erenoamáš mearkkašupmi sámelihkadussii.
– Sirbmá lea ČSV-lihkadusa vuolggabáiki ja dat vuoigŋa ain eallá Sirpmás. Háliideimmet doallat vuollánmeahttun vuoigŋa-čájáhusa doppe doarjun dihtii skuvlla danin go Sirpmá skuvla lea sieiva sámi skuvla, mii bajásgeassá ođđa, nana sápmelaččaid, geain eallá ČSV-vuoigŋa. Sirbmálaččat eai leat ovdalge vuollánan, eaige galgga dálge vuollánit, lohká Jenni Laiti.
Ruoktot máhccan
Dál leat govat sadjosis Sirpmá skuvlla lášmmohallanlanja seinniin, ja doppe galget leat olles dán geasi dassái go Suohpanterror-gázzi boahtá čájáhusa lusa.
– Mii Suohpanterroris háliidat ávvudit «ruoktut máhccama» ja leatge lágideamen vuollánmeahttun vuoiŋŋa ávvudeami čakčageasi Deanus, muitala Laiti viidáset preassadieđáhusas.
Čájáhus lea oaidnin láhkái dassái go luossabivdu nohká ja lea ovdal čájehuvvon Márkomeanus ja Siida museas Anáris. Čájáhusa lea Márkomeannu buvttadan.
