Sámediggi ja KS leat odne vuolláičállán ovttasbargošiehtadusa mii galgá sihkkarastit formaliserejuvvon ja vuogádatlaš ovttasbarggu áššiin main leat oktasaš beroštumit.
Odne deaivvadedje Sámediggi ja Gielddasurggiid organisašuvdna (KS) vuolláičállit ovttasbargošiehtadusa Sámedikkis Kárášjoga gielddas. Ovttasbarggu ulbmil lea ovddidit bálvalusfálaldaga sámi álbmoga várás, sámi giela ja kultuvrra ektui, čállá Sámediggi preassadieđáhusastis.
Sámedikki ja KS ovttasbargošiehtadus čatnasa dán šiehtadusáigodagas dáidda surggiide:
NAČ 2016:18 Váibmogiella. Sámi giella ja kultuvra gielddasuorggis. Dakkár fágaolbmuid rekrutteren geain lea sámi giella- ja kulturgelbbolašvuohta. Digitaliseren ja sámegiella gielddain. Sámi giella ja kultuvra mánáidgárddis ja skuvllas. Árvvoštallat ásahit fierpmádaga daid gielddaid várás main lea sámi álbmot. Gulahallan konsultašuvdnaortnega birra.
