Sámi filbmadahkki Nils Gaup lea okta dain gii lea vuoitán stuora kulttorbálkkašumi.
«Anders Jahrens Kulturpris» lea Norgga stuorámus gudnebálkkašupmi, sidjiide geain lea leamaš erenoamáš buorre kultuvrralaš áŋgirruššan. Dán jagi leat njeallje vuoiti filbmamáilmmis geat ožžot obbalaččat guokte miljovnna ruvnno.
Bálkkašumi lávdegotti jođiheaddji Åse Kleveland dadjá ahte Nils Gaup, Margreth Odin, Joachim Trier ja Deyaah Khan leat leamaš guovddážis Norgga filmmain sihke našuvnnalaččat ja riikkaidgaskasaččat. Bálkkašupmi juhkkojuvvo čakčamánu 8. beaivvi.
– Norgga filmmat leat stuorrunáigodagas. Vuoitit čájehit iešguđetlágan surggiid filbmadáidagis, ja nu addet sii obbalaš gova dán stuorrunáigodagas, dadjá Åse Kleveland.
Lea vuosttaš geardde go dát bálkkašupmi juhkkojuvvo filbmadahkkiide. Dan dihte lei ge bálkkašumi lávdegoddái lunddolaš gudnejahttit guokte filbmadahkki, Gaup ja Trier, ja guokte dokumentárafilbmadahkki, Olin ja Khan.
Sávvá bálkkašumi movttiidahttit
Obbalaš supmi lea guokte miljovnna ruvnno. Dat juhkkojuvvo vuitiid gaskkas, miljonbeale ruvnno oažžu juohke vuoiti.
– Min sávaldat dáinna bálkkašumiin lea ahte filbmadahkkit ožžot duođaštusa ahte leat bargan bures filbmadáidagiin iežaset karriearas. Mii sávvat maiddái ahte dát movttiidahttá, ja ahte ruđat geavahuvvojit ráhkadit vel eambbo njuorasmahtti filbmavásáhusaid, dadjá Kleveland.
