Kárášjogas bissehedje politiijat dievddu gii navdo vuodján gárrenoaivvis.
Finnmárkku politiijat čállet Twitteris mii lea dáhpáhuvvan mannan ija sin barggus. Kárášjogas čállet ahte sii bissehedje muhtin guđatlot-jahkásaš dievddu johtolagas. Son lea dál áššáiduhtton vuodján gárrenoaivvis.
Muđui čállet politiijat smávva dáhpáhusaid ja feastarieja birra Twitteris. Sii leat earret eará ferten bivdit musihka vuolidit Bjørnevatn báikkis Girkonjárggas mannan ija. Olbmot ledje váidalan politiijaide go muhtin priváhta viesus čuojahit beare jitnosit musihka, ja njealjátlot-jahkásaš dievdu, gii orru viesus, gohččojuvvui doalahit jaskadin gitta logi rádjai iđidii. Álttás lei seammalágán bargu politiijain, ja muđui fertejedje doppe feastagussiid maid oažžut olggos ovtta viesus go eai lean ieža jeagadan mannat.
Hámmerfeasttas ges fertejedje vuojihit badjelaš 50-jahkásaš nissona ruoktot go lei beare gárremiin. Čáhcesullos fertejedje ges doalvut goalmmátlot-jahkásaš dievddu doavtterváktii, go sus lei hávvi oaivvis. Maiddái dat olmmái lei politiijaid dieđuid mielde gárremiin. Eai sii dieđe manne sutnje lei šaddan hávvi.
