Golggotmánu 2. beaivvi álggahuvvui ođđa geahččalandoaibma Romssa Universitehtabuohcciviesus (UNN) mii galgá álkidahttit ambulánsavuddjiid barggu. Dál vuodjá vilges ambulánsa mii sáhtostallá buhcciid geat galget buohccivissui.
Golggotmánu 2. beaivvi álggahuvvui ođđa geahččalandoaibma Romssa Universitehtabuohcciviesus (UNN) mii galgá álkidahttit ambulánsavuddjiid barggu. Dál vuodjá vilges ambulánsa mii sáhtostallá buhcciid geat galget buohccivissui.
Leat máŋga eará buohcciviesu Norggas gos dakkár fálaldat lea buhcciide geat galget beassat buohccivissui, dieđiha Pingvinen neahttasiidu.
– Lea dehálaš addit rievttes bálvalusa pasieanttaide. Min ambulánssat leat šaddan ollu gerddiid viežžat pasieanttaid geat fertejit veallát, muhto ii leat dárbu medisiinnalaš čuovvoleapmái sáhtus. Dán mii rievdadit dál, muitala ambulánsaossodaga jođiheaddji Per-Øivind Sørgård.
(Ášši joatká gova vuolde)
Vuosttaš vilges ambulánsa lea heahteveahki sisaboađu bokte UNN:s Romssas. Govven: Per-Christian Johansen
Vuosttaš vilges ambulánsa Romssas
Geahččalanprošeakta bistá geassemánu 30. beaivvi rádjái. Vuodjimat Gálsii ja Báhccavutnii sáhttet maid čađahuvvot. Jus čájehuvvo ahte dát doaibmá hui bures, de šaddá bissovaš doaibman ja árvvoštallet maid fálaldaga viiddidit olles UNN doaibmaguvlui.
– Sáhtostallan lea vuosttažettiin UNN ja buhcciidruovttu gaskkas, doavtterkantuvrra, Romssa suohkana ođđa dearvvašvuođavistti, girdišilju ja pasieantta ruovttu gaskka, muitala UNN Pasientreiser prošeaktajođiheaddji Einar Holand.
Jáhkket máŋga mátkki gártat
Biillas lea váibmovuolggahanmašiidna man fievrredeaddjit galget máhttit geavahit jus mihkkege dáhpáhuvvá, muhto biillas eai leat alit čuovggat ja sirenat. Biila lea anus árgabeivviid gaskal diibmu 10.00 ja 17.00 go lea eanemus dárbu dasa.
– Mii jáhkkit ahte šaddet gaskal vihtta ja čieža vuodjima juohke beaivvi. Jus šaddá hui dárbu eanet mátkkiide, de sáhttet dábálaš ambulánssat ain veahkkin midjiide, muitala Per-Øivind Sørgård.
