Vihtta olgoriikkalaš oaggunturistat gevve áhpeheahtái go sin fanas gopmánii Torsvåg báikki davábealde. Guovttis leaba kritihkalaš dilis.
Vihtta olgoriikkalaš oaggunturistat gevve áhpeheahtái go sin fanas gopmánii Torsvåg báikki davábealde. Guovttis leaba kritihkalaš dilis.
Diibmu 14.36 bođii diehtu Davvi-Norgga Váldogádjunguovddážii dáhpáhusa birra Torsvåg guovllus. Váldogádjunsentrála válljii sáddet Sea King girdi Banakis, ambulánsagirdi UNNas Romssas ja Skiervvá gádjunfatnasa Oscar Tybring vaikko eai lean sihkkarat man duođalaš diehtu lei. Orion-girdi maid sáddejedje Torsvåg báikái ja eará siviila fatnasat maid bohte veahkkin báikái.
Easka diibmu 15.27 ožžo čielgasii ahte ledje vihtta olgoriikkalaš turistat geat ledje gopmánan sullii 13 km davábealde Torsvåg.
Diibmu 16.45 ledje nagodan gádjut golbmasa dain turisttain, ja eai dieđe gos guovttis leaba, muhto jáhkket sudno leat gopmánan fatnasa siste.
Diibmu 16.50 duođaštuvvo ahte leat gádjon ovtta olbmo eret gopmánan fatnasis, ja leat su sádden dál buohccivissui Romsii dikšui.
Diibmu 17.30 duođaštuvvo ahte leat maŋemus olbmo viežžan eret gopmánan fatnasis, ja leat álgán gádjut su heakka, ja son galgá maid dolvot buohccivissui jođáneamos lági.
Váldogádjunguovddáš muitala ahte ledje njealjis Ruoššas eret ja okta Litauenis eret.
NTB dieđihii maŋŋebárgga eahkedis ahte dat guovttis geat dolvojuvvuiga buohccivissui, leaba kritihkalaš dilis.
